Mundart-Kolumne 
Do bische platt: Wammer Wild-West-Geschichde lest, werd ma net glei kriminell
De Ludwisch is schunn immer e Vorbild fer mich gewest, weil er all des war, was ich ah gern sinn wollt: Richder am Owwerlandesgericht, des zu seiner Zeit Appelationsgericht geheeß hat, Geschichdevezähler, Chronischd, Journalischd, Kerchemann un engaschierder Biercher vun seiner un meiner Heimtatstadt. Ich hab alles ausprobiert bis uff eens: Noh mir is kee Schdroß benennt worr, awwer was noch net is...
Em Ludwich sei jingerer Bruder, de Willem, hat„s net deheem gehall, der wollt in die Welt enaus, hat„s wennischens bis Speyer geschafft un is dort Domkapitular worr. Als junger Borsch hat er de Roman „Die schöne Zweibrückerin“ geschribb, un was mich besunnersch freed, sogaa e Krimi. Nur eens hann die zwee net ferdisch kried: ebbes in de Zweebricker Mundart. Na aller, mer kann halt net alles hann.
Vor korzem bin ich uff e Aufsatz vum Willem mit dem Tidel „Lesesucht“ geschdoß, mit dem ich ganz un gaa net investann bin. Do mennt er, dass die Juchend ihr Leseluschd uff die klassiche Lideradur beschränke soll, weil nur die fer die rischdisch Bildung guud wär. Awwer nee, die junge Leit dääde sich dodran net halle un immer meh Schund un Kitsch lese, Piradegeschichde un Raiwerpischdole, un sich dodemit de Charakder vederbe. Am Enn wäre se zu nix meh se gebrauche un dääde sogaa kriminell werre. Un als so weider.
Mei liewer Willem, do bische arisch uff„m Holzweesch. Mei gansie Generation un vor allem ich selbert hann nämlich zu denne Schundleser gehört unn sinn trotzdem ganz anschdännische Leit worr. In meiner Bibliothek steht heit net bloß de Goethe, de Schiller un de Molitor, sonnern neewedran e Sammlung vun Groschehefdcher, die ich als Lauser veschlung hab: Angefang beim Tom Prox, iwwer Pete, die Zeitchrift für die Jugend, Tom und Fred, de Tom Mix un wie se all heeße, die Wild-West-Helde. Besunnersch stolz bin ich uff die Geschichde vum Rolf Torring un Jörn Farrow, die schunn mei Vadder als junger Borsch geles hat. Mer sieht denne Heftcher an, dass se einisches an Leseluschd mitgemacht hann: Sie sinn bis in die Nacht unner de Bettdeck un im Reliunnerrichd unner de Bank geles worr, hann im Hossesack Eselsohre kriet un im Freibad an de Schließ Flecke vum Sunneöl. An de Thek vum Schorsch Nutz in de Maxstroß hab ich defor mei ledschdes Daschegeld geopfert.
Schbäder hab ich„s net iwwer„s Herz kriet, die Groschehefdcher fortseschmeiße. Un Ehrewort, mei liewer Willem Molitor, ich bin bis heit trotz meiner Schmökersucht net kriminell worr un ah net vorbeschdroft.