Mundart-Kolumne Do bische platt: Unser Herzoch Christian war e Geheimniskrämer

Mir feiere desjohr in Zweebricke e doppeldes Jubiläum, des an unser große Herzochszeide erinnert. Vor 300 Johr is de Christian IV. gebor, unser aller Lieblingsherzoch, de „Bien aimé“, wie mer domols gesaat hat. Die Zweebricker hann lang an’m gehat, sei Reschende-Zeit war vun 1735 bis 1775. Aller, er is halt schunn mit dreizeh uff de Thron gegrabbelt, do hat ne erschd mol sei Muddie bei de Staatsgeschäfde vedrede misse. Awwer finf Johr späder hat er dann selbert losgeleet. Ihm vedanke mer es Geschdied, de Schwarzbachkanal, es Zweebricker Porzellan, die Vorstadt un es Hoftheader. Die Porzellanmanufakdur uns Theader hann allerdings net lang gehall.

Er war e stolzer Barockferschd, de Christian, mi’m Louis vun Frankreich befreind un hat in Paris sei eischenes Palais gehat. Mit annere Worde: Er hat unser Stadt e Haufe Geld koschd.

Es Mariannche hat als gedeiwelt

Un er war e Geheimniskrämer. Wie er sei Mariannche in Mannem vun de Theaderbiehn schnurstracks in sei Schloss geholt hat, ware all der Meinung, er dääd sich halt sei eischenie Pompadour halle. Nix do, es Mariannche hat so lang gedeiwelt, bis er’s in Paris heemlich gefreit hat. Des hat seine Söhn, em Krischan un em Guillaume, awwer nix genitzt, sie ware net standesgemäß un hann desentweje net sei Nachfolscher werre kenne. Statt desse sinn se Kommandeure vum Reschiment Royal Deux Ponts worr, hann de Amis in ihr’m Unabhängischkeitskriesch geje die Brite geholf un am Enn die entscheidend Schlacht vun Yorktown gewunn. Ah net schlecht.

De Christian hat außerdem e heemliches Hobby gehat, vun dem nimmande ebbes hat wisse derfe: Er war Alchimist un hat vesucht, Gold se mache. Sei Adlatus dodebei war de Physikus Stahl gewest, der ah es Porzellan gebrennt, awwer ansunschde statt Gold bloß Schulde gemacht un de Herzoch iwwers Ohr gehau hat. Un des net e knapp.

E Bild vun em Ferschd

Bei de Fraue hat’s de Herzoch geriss gehat. Er war halt e stolzer Reidersmann un e Bild vun em Ferschd. Un des Bild hat sei Hofmoler, de Johann Christian Mannlich, gemolt. Des is es zwedde Jubiläum, weil der vor 200 Johr in Minche gestorb is. Er hat unner drei Widdelsbacher gedient, nohm Christian beim Karl Auguschd, un wie’s Herzochtum schunn lang beim Deiwel war, beim Keenisch Max vun Bayern. Wie des Mäxje e klenner Lauser war un im Gaade vun unserm Schloss gespielt hat, do hat de Mannlich schunn es erschde Bild vun’m gemold.

Un was war vor hunnerd Johr, werre ihr jetzat wisse wolle, gebt’s do net ah e Jubiläum? Ei des werd sinn: 1922 hat mei Urgroßvadder Hermann es Haus in de Landauer Stroß kaaf, wo ich gebor’ bin un heit denne Beitrach do fer die Zeidung schreib. Wann des kee Grund zum Feiere is!