Zweibrücken Do bische platt: Mit Gipsbrocke an die Ruinemaure gekritzelt

Narrehänd beschmiere Disch un Wänd, saat de Volksmund. Aller, beim Disch is es net so schlimm, denne hat mer dabber widder abgewischt, an de Hauswand degeje noh § 303 Abs. 2 StGB sogaa strafbar.

Ah wann des Kunschd is? Obacht, des kommt ganz druff an, ob de Hausherr demit inverstann is. Guud, wann de Gerhard Richter odder de Banksy was an mei Haus mole dääde, hätt ich nix degeje. Un so ganz ausgeschloss is des net, weil mir in Zweebricke jo unser eischener Banksy hann, de Peter Schaumburger. Der hat sei Graffities, wie mer die Spraybilder nennt, schunn iwwerall in de Stadt platziert un jeder kann sich dran freeje. Awwer es gebt halt leider ah die schlimme Schmierfinke, die nix Ordentliches sestand bringe un bloß hässliche un dumme Spure und Sprich hinnerlosse.

Kunschd an de Unnerfiehrung am Schwarzbach

Desweje will mer jetzat e Projektgrupp grinde, die vor allem die Nazischmierereie beseidische soll, am beschde, indem mer se iwwermold. De nächschde Schritt wär dann, dass mer de Spraykinschdler Fläche zur Vefieschung stellt, wo se sich mit ihre Spraydose ausdobe kenne. Es gebt do schunn die erschde Kunschdwerke, zum Beispiel an de Unnerfiehrung am Schwarzbach gejeiwwer vum Bootshaus. Es is halt nur bleed, dass ah dort schunn widder die Narrehänd am Beschmiere ware.

Mer missd halt iwwerleje, wo genunk Platz is, dass die Sprayer bei uns ihr eischene East Side Gallery geschdalde kennde, so wie die in Berlin, die jo weltberiehmd worr is.

Die Kinner Klecker Bande

Mir hann sowas tatsächlich schunn emol gehat, zwansisch Johr is des her. An de Mauer zwische de Luitpold- un de Fruchtschuppestroß, dort wo mer frieher am Bubehauser Iwwergang ewisch an de Schranke gewaad hann, hat sich domols e Grupp ve’ewischd, die sich Kinner Klecker Bande genennt hat. Denne ihr Spraykunschd is dort heit noch se siehn, wann se ah schunn ziemlich vewiddert un veblasst is. Wann ich mich net err, hat domols unser Streetworkerin Karin Bieg zamme mi’m Patrick Hahn des Projekt ausgeheckt.

Die Stroßekinschdler mit de Spraydos hann all minanner Vorgänger gehat, die allerdings gans annerschder geschafft hann. Die sinn mi’m Zeichenblock un Stifd dorch die Stadt schbaziert un hann vorm Kriesch die schenschde Eckelcher gezeichend, de Fritz Trauth, mei alder Zeichenlehrer Schulz, de Richard Schumacher un wie se all geheeß hann. Enner vun denne hat dann schunn demit angefang, sei Bilder un Skulpture an die Hauswänd zu fabrizere, de Sepp Semar, mit Farb un Putz, als Mosaik, Relief un Sgraffity, wie er’s schunn genennt hat. Die Mauerkunschd kammer heit noch an viele Gebäude bewunnere, so an de Feschdhall un am friehere Landratsamt.

Un e Strichmännche dezu

Mir Lauser ware domols awwer ah net faul. Mit Gipsbrocke aus de Ruine hammer unser Botschafde an die Mauer geschribb: Hans is doof! Bärbel stinkt! Un e Strichmännche dezu, ferdisch! Leider kammer des heit nimmie siehn.