Zweibrücken Do bische platt: Mir hann in Zweebricke bei de Schuh lang in de erschde Liga mitgespielt

Die Bermesenser wolle jetzat mit ihrer Schuhtradition groß raus komme. Es Schuhhandwerk soll Weltkuldurerbe gebbe, sie wolle e Schuhweech anleen un als so weider. E Schlabbeflicker-Denkmal hann se schunn, es erschde Schuhmuseum steht allerdings e Stickche weider in Hauesteen.

Aller, sie ware halt in zwee Johrunnerde die Schuhhauptstadt vun ganz Deitschland, bis es dann in de 70er Johre arisch die Bach nunner gang is. Ich hab die Pleide direkt an de Front mitkriet, als Konkurs- un Strafrichder am Bermesenser Amtsgericht: „There is no Business like Schuhbuiness“ war domols die Devise, wie die Schecks wie Luftballone geplatzt sinn.

Zweebricke hat bei de Schuh lang mitgespielt: Am Himmelsbersch hat de Albert Haag bis korz nohm Kriesch in seim Fabrikche Schuh genäht, un drauß in Auerbach hann iwwer zweedausend Schlabbeflicker bei de Dorndorf geschafft. „Unser Fabrik“ hann die Auerbacher stolz gesaat. Kee Grund, stolz se sinn, hann se vorm Kriesch gehat, wie „unser Fabrik“ arisiert un de Fabrikant Langermann aus seim eischene Haus fortgejaat worr is. Sei Nachfolscher war de Richard Greiling, der vor allem Soldadestiwwel produziert hat. Nohm Kriesch hann dann die Langermann-Erbe widder ihr Recht kriet. In de Bombenacht vum 14. März 45 is es Dorf weitgehend veschont geblibb, die Fabrik hat awwer schwere Treffer abkriet. Schunn ball nohm Widderaufbau hann dann die fedde Johre angefang un „Dorndorf“, wie’s jetz geheeß hat, is als Marke weltberiehmt worr.

Allegar Langermänner

Mir ware allegar Langermänner; mei Großvadder Karlemann, mei Oma Gretche, mei Vadder un sogar ich. De Oba is mit de Familie 1930 vun Bermesens hergezoo, weil er in de Fabik als Buchhalder Arwed gefunn hat. Un korz druff war er Vorsitzender vun de Langermann-Fußballer, wie die Auerbacher Kicker domols genennt worr sinn. Mei Vadder hat dort in de A-Juchend gebolzt. Bis Anfang de 50er Johre hat de Fußballplatz direkt gejeiwwer vum Mannlichplatz gelee, un ich hab vum Wohnzimmerfenschder vun de Großeldere aus zugucke kenne. Nohm Abidur hab ich dann selber bei de Dorndorf in de Semeschderferie als Werkstudent geschafft un im Keller vun de Fabrik Hinnerkappe sordiert.

Wie de Großvadder Karl nohm Krieach in Rent Gang is, hann die zwee, die Oma un de Oba, ihr Wohnung iwwer de groß Trepp am Mannlichplatz zur Dorndorf-Filiale gemacht un sich durch Heimarwet die schmal Rent uffgebessert. De Essdisch in de Wohnstubb war am Owend die Schuschderwerkstatt. Die Oma hat mit de Ahl es Ledder uff’m Holzklotz geschnitt, de Oba hat die Deele mi’m Faischdel geglätt un se geklebt. Die ferdische Stick sinn mit de Penninge, die’s defor gebb hat, in e Lischd ingedraa worr. Es ganze Zimmer hat herrlich noh Ledder un Buchsleim geroch. Ich hab debei gehockt un durft de Penningslohn zammerechele. Arisch rendiert hat sich die Sach net, awwer mir drei hann zu de große Dorndorf-Familie gehört.