Mundart-Kolumne Do bische platt: Mei Olympiaheld is de Horst Hrubesch

E Pälzer Krott hat in Paris Gold geholt un ihrm Herrgott e Liedche gesung. Jetzat wo die Olympische Spiele erum sinn, werd abgerechent, un ich hab fer mich mei eischene Favoriddelischd uffgestellt. Erschd hab ich an de Schorsch Grozer un an de Andi Wolff gedenkt, weil ich frieher selbert Volleyball gespielt un im Handballdoor gestann hab. Dann hab ich mer’s annerschder iwwerleet.

Mei Held is enner aus meiner Generation: de Horst Hrubesch. Ich menn sowieso, dass mer die Trainer net vegesse soll, die hinner jedem Erfolsch stehe, un do is de Horst fer mich de Supermann: ehrlich, grad enaus, ohne Flause, bescheiden un struwwelisch, gamz annerschder wie die geschniegelde Fußballbubies. Alla ich geb’s zu: Mir gefallt ah sei Frisur, so hab ich frieher ah mol ausgesiehn. Schunn als aktiver Fußballer war er enner vun dere seltene Sort wie de Liebrich un de Briegel, e ganzer Kerl, der nie uffgebb hat, un mit alle pälzer Tuchende, wann er ah kee Pälzer is. „Koppballungeheier“ hat mer zu’m gesaat, weil er mi’m Kopp meh Doore gemacht hat wie mit de Fieß, emol angeblich sogaa e Elmeder, na aller.

Uff de nächschde Plätz komme dann zwee junge Fraue. Jetzat denke bloß net: De Oba hat sich in die Mäde veguckt. Nee, des hat annere Grind. Erschd die Darja Varfolomeev, die Gold in de Sportgymnastdik gewunn hat. Ich bin ehrlich: Die Sportart is mir bis jetzat völlisch unbekannt gewest. Hut ab vor dere Leischdung! Aller, mi“m Makeup hann die Mäde arisch dick uffgedraa, awwer des gehört halt dezu; angeblich trainier se des ah jede Daa e ganzie Stunn lang. Die Darja is in Sibiria gebor, als Kind ganz alleen zu ihrm deitsche Großvadder noh Aschaffebursch komm un hat dort deitsch un“s Turne gelernt. Un des hat mer ganz besunnersch imponiert: Bei de Siescherehrung hat se unser Nationalhymne Wort fer Wort laut mitgesung, un des mit ihre 17 Johr, do kenne sich einische e Stickche abschneide.

An die dritt Stell setz ich e Pälzer Mäde: die Yemisi Ogunleye, die in Paris die Kuchel am weidschde geschmiss hat. Denne raffinierde Name hat se vun ihrm ghanaische Vadder, sie selbert stammt werklich aus Bellem. Wesweje sie mer so arisch gefallt:. In meiner Kindheit hann die Kuchelstoßerinne ganz annerschder ausgesiehn un hädde eischentlich zu de Schwerathledinne zähle misse. Bei Olympia in Rom zum Beispiel ware zwee russische Schwestere erfolgreich, die Irina un die Tamara. Wann die zwee kolossale Genossinne angetreet sinn, hann se erschd de Stalinorde abgeleed. Angeblich hann die Müdder deheem in Russland zu ihre Kinner gesaat: Wann de net brav bisch, kommt die Tande Tamara! Im Vegleich dodezu is die Yemisi e Modellathledin, wie se sinn soll, e fröhlischie Pälzer Krott, die bei de Pressekonferenz fer ihr Herrgott e Liedche geträllert hat, un kee Mensch veschwend ah bloß e eensischer Gedanke an Doping odder Testosteron.