Mundart-Kolumne 
Do bische platt: Es Sisu un sei Bierbauch-Jinger
Ledschd Johr hab ich eich vezählt, dass die Finne im Glickskalenner an erschder Stell stehe. Jetzat weeß ich Bescheid: Am Samschdaa Owend beim Start in de Kuldursommer, hat so e Comedian, wie sich die Witzbolde heit nenne, in de Feschdhall verood, was es mit dem finnische Glick uff sich hat. Un wie mer uns geschder Owend es erschde Mol seit de Corona widder beim Bruno in seiner Kneip beim Feierowendschöppche gedroff hann, hab ich’s ne vezählt: Es leid an nix annerem als wie am Sisu.
Sisu, hat de Paul gemennt, was soll dann des jetzat widder bedeide? Er hätt mol e Schätzje gehat, des hätt Susi geheeß, mei liewer Schollie, des wär zwar net aus Finnland gewest, awwer aus Battwiller. Un sei Monache wär heit noch eifersichdisch, wann’s bloß denne Name heere dääd.
Jetzat lenk net ab, hab ich gesaat, es geht um Sisu un net um dei Exschätzje. Bassen uff, ich erklär’s eich. Des Wort gebt’s bloß im Finnische, un mer kann’s net so recht deite. Es wär so e innerie Kraft, so aus de Körpermitt, die jeder in sich selwert wecke kennt. Eischentlich derft mer gaa net so viel driwwer schwätze, denn die Voraussetzung fer des Sisu wär die Ruh, in dere die Kraft leie dääd, awwer ah die Bescheidenheit, mit wennisch sefriede se sinn, die Gesellischkeit, beinanner se hocke un sich se vestehe, ohne viel Worde un Gedöns.
Sich uff’s Wesentliche se besinne, dorum geht’s bei dem finnische Sisu, um nix anneres. Mer misse all minanner in uns gehe, dort e Weilche bleibe un dann wie de Phönix aus de Äsch gestärkt zum Vorschein komme. So ähnlich hat des der glickliche Finne in de Feschdhall erklärt. Hanner des kabiert?
De Bruno hat die Stern in Falde geleet, was er immer macht, wann er’s net kabiert, un dann noh seim Wischlumbe gegriff, was er macht, wann er net weider weeß. De Paul hat in sei Schoppeglas geguckt, als dääd’m des beim Nohdenke helfe. Kenner hat e Wort geredd. Dann hat de Paul uff emol iwwers ganz Gesicht gestrahlt.
Bass uff, hat er gesaat, vesteh ich dich recht? Des finnische Glicks-Sisu bedeit, dass mer beinanner hockt, so wie mir grad jetzat an de Thek! Un dass mer die Kaft aus unsrer Körpermitt raushohle, also aus unserm Bierbauch! Un dass mer debei net viel schwätze, sonnern sefriede sinn, so wie mir, wammer unser Feierowendschöppche drinke! Un dass mer dodebei net huddle, sonnern uns Zeit losse! Un dann am Enn gestärkt wie der Phönix aus de Äsch heem gehe! Ei wisse ner was! Mir drei sinn jo die reinschde Sisu-Jinger dojinn, do kenne sich die Finne noch e Scheibche abschneide.