Zweibrücken Do bische platt: Die Lahmärsch heeße heitsdaas Entschleuniger

De Paul schellt oft iwwer sei Filius, de Lukas, weil der nix ferdisch kriet un e Schlofmütz wär. Bei dem geht nur enns schnell, saat er dann als, der gebt dabber mied. Aller, mir Pälzer sinn jo als bedächdische Leit bekannt, mir huddele net, versuch ich ne dann se tröschde, mir losse uns Zeit, immer dussma, wer langsam reit, kommt grad so weit, eile mit Weile, komm ich heit net, komm ich morje. Un Lukas is jo e Name aus de Bibel, do ware die Leit fromm un sinn net dorch de Daa gehetzt, gell. De Moses hat mit seine Leit 40 Johr fer de Heemweesch dorch de Sinai gebraucht. Un guck der de Bruno an, saa ich dann noch, der braucht fer e Feierowendschöppche se zappe genau siwwe Minudde. Uff’m Oktoberfeschd in Minche hann se e Turbozapphahn erfunn, der in zeh Sekunne e Moß vollspauzt. Un was hann se devunn? Bloß Hetz un Stress un e Haufe Schaum. Dann is de Paul sefriede un waad geduldisch un in aller Ruh uff’s nächsschde Schöppche.

Un jetzat les ich do in de Zeidung, dass die Cittaslow-Bewechung ganz groß in Mode kommt. Des hann nadierlich die Italiener erfunn, vun denne ah es Dolce Vita stammt, die Kunschd, es Lewe se genieße. Un dodezu basst net die Hascht. Cittaslow nenne sich Städtcher, die besunnerer Wert uff Gemiedlichkeet un Bedächdichkeet leje un net uff dabber dummel dich. Bei uns in de Palz macht zum Beispiel Deideschem mit.

Mit de Schneck als Wappedier

Do hab ich mich erinnert, dass ich vor einischer Zeit geles hab, Blieskaschdel wär jetzat ah e Cittaslow. Ich hab glei ans Rathaus dort geschribb un gefroot, ob se bei der Sach noch mitmache dääde. Es hat vier Woche gedauert bis ich Antwort kriet hab: Ich sollt mich noch e Weilche gedulde un bekäm bis zum Johresenn Bescheid. Aller, do hab ich gewisst, dass se in Kaschdel noch debei sinn.

Ah bei uns in Zweebricke hat’s mol so e Entschleunigungsverein gebb, wie er sich genennt hat, mit de Schneck als Wappedier. Mer hört awwer nix meh devunn, wahrscheinlich is die Chose ingechlof, un des dääd jo grad widder basse. Annere behaupde, sie hädde bloß de Vereinsname geännerd un dääde jetzat Stadtvewaldung e.V. heeße.

Neewe dem Bericht iwwer die langsame Städt un die Entschleunischung hab ich e annerie Nachrischt entdeckt, die genau dezu basst: Es gebt seit e paar Johre de Trend zu höherem Alder bei de Vädder, die sich jetzat also ah meh Zeid mit ihre Nachkomme losse: Komm ich heit net, komm ich morje. Im Schnitt sinn die Herre 34,7 Johr alt, wann se Vadder werre. Dann misse se sich ah net wunnere, wann se so Lahmärsch in die Welt setze wie em Paul sei Lukas.