DO BISCHE PLATT Die Schreiberei, die Singerei un die Sauferei

Wann mich de Paul uff die Schipp nemme will, dann frood er mich als: Unn, was macht die Schreiberei, klappt’s noch? Er weeß, dass ich denne Ausdruck net leide kann, die Schreiberei. Ich geb’m dann als kontra un froo ne: Un, was macht die Bolzerei? Er kickt nämlich seit Neischdem in Auerbach bei de AH.

Un wann des net langt, froo ich noch: Un was macht em Mona sei Singerei? Er is nämlich ganz stolz uff sei Monache, dass es im Kerchechor mitmache derf. Dann is die Unnerhaldung beim Bruno an de Thek fer die nächschd halb Stunn geloff, mir sitze still vor unserm Feierowendschöppche, un jeder macht sich iwwer de annere sei Gedanke.

Wer Gedichdelcher schreibt, kann aa Schriftfiehrer mache

Aller, mir sinn jo all die Frotzeleie vum Paul gewöhnt, un ich nemm em das mit de Schreiberei ah net werklich iwwel, dem Dummschwätzer. Es is mei Hobby, nix weider. Ich weeß, dass mei Chance, de Lideradurnobelpreis se krien, net arisch gud sinn. E rischdisch guder Schriftsteller hat mol gesaat, e schlechder Autor dääd mer do dran erkenne, dass er sich fer gud halt – un denne Fehler will ich net mache.

Wie ich als junger Kerl bei de Handballer war, hat unser Vorsitzender, de Elef, eenes Daas gemennt: Ihr Leit, de Wolfgang weeß net so recht, wie mer de Balle schmeißt. Awwer er schreibt scheene Gedichdelcher, der kennt eichentlich unser Schriftfiehrer werre. Aller, hab ich halt die Schreiberei fer de Verein erledischd. Wichdicher wie die Spielerei war beim Elef die anschließende Singerei un Sauferei.

Die Zeidung in die nasse Schuh

Un’s bassiert mer immer widder, dass mer enner vun de alde Kamerade in de Stadt begeschend un froot, weeschde noch domols beim Elef, un was macht dann die Schreiberei. Dann saa ich: Ich sitz grad an meim neie Buch, Obacht, du kommsch ah drin vor. Un wann ich dann noch saa, dass ich des Buch mit ner Lesung am nächschde Dunnerschdaa owens im Herzochsaal vorstell un er ingelaad is, dann iwwerleet er korz un schiddelt de Kopp: Schad, do kann ich net, do muss ich grad mit meim Hund enaus.

Do mei Mundartkolumne, die ich jed Woch seit fuffzeh Johr abliwwer, is de allerbeschde Platz fer mei Schreiberei. Ich steh an immer een un demselbe Daa in de Zeidung – mer lest’s odder losst’s bleibe un schmeißt dann die Zeidung fort odder stoppt se in die nasse Schuh, demit die drickele odder wickelt irschend ebbes enin. Un domit is die Beer geschält.

Wie ich frieher e klenner Buu war, wär’s schlimmer komm: Mei Vadder hätt die Seit in handliche Sticker geriss un dann naus uff de Abort an de Nachel gehonk: die Schreiberei fer die Scheißerei.