Mundart-Kolumne: do bische platt Die scheinheilische Schbazierer berufe sich ah noch uff’s Grundgesetz

Hopp, gehe mer e Stickelche schbaziere! Wie oft hab ich des zu meiner Fraa gesaat un sie zu mir. Wammer nix besseres se duun gehat hann un’s Wedder dennoh war, hammer halt e Schbaziergang gemacht, dorch de Wald in die Fasanerie odder mi’m Hund drunne in die Alle. Des war e ganz un gar harmlosie Sach, so e Schbaziergang, do hat sich nimmande was Beeses debei gedenkt. Awwer in Zeide vun de Corona is eewe alles annerschder.

Jetzat treffe sich die Impfgegner, die die Coronamask mi’m gelbe Schdern in de Nazizeit vegleiche, owends odder am Wocheend, um se demonschdriere. Un des duun se net ehrlich, sonnern mache uff Schbaziergänger, demit se sich net an die Vorschrifde halle misse; un dodebei berufe se sich ah noch uff’s Grundgesetz.

Die treibe Schindluder

Des nenn ich Schindluder treibe mit enner kulturelle Tradition. Jawoll, de Schbaziergang is e Erfindung vun de Romantik. Domols hat mer noch Luschdwandele dezu gesaat, zu Zeide vum Goethe un Eichendorff, is dorch die Nadur schbaziert un hat sich nohm blooe Band un de Määde umgeguckt. Die Franzose ware die Weltmeeschder in dere Disziplin un sinn dorch Paris flaniert. Dodefor sinn mir Deitsche dorch die ganz Welt schbaziert, hann „Hänsje klein, ging allein in die weite Welt hinein“ gesung un so wie de Alexander Humboldt zu Fuß de Amazonas erforscht. Die Handwerksborsche ware rischdische Profis un hann’s desweje ah Wannerschaft genennt. Awwer all minanner hann se’s guud gemennt, kee beese Gedanke im Kopp gehat un de Schbazierschdock net als Knübbel missbraucht. Nee, des hat de Schbaziergang net vedient, dass ne sich die Coronaleuschner als Schutzmändelche umhänge.

Wann ich des hohe Lied uff de Schbaziergang sing, bin ich net so ganz ehrlich. Es hat in meim Lewe Zeide gebb, do hab ich mich vorm Schbaziere gedrickt, wo ich nur gekennt hab: als Lauser. Wann zum Beispiel mei Muddie gesaat hat, am Sunndaa komme die Sulzbacher uff Besuch, hab ich gewisst: Des gebt widder e Schbaziergang in de Rosegaade. Des war net bloß die langweilischd Sach uff de ganze weide Welt, nee, ich hab ah mei gude Schdoffhose anziehe misse, die weiße Knieschdrimp un die enge Sunndaasschuh.

Druckener Kranzkuche hat’s gebb

Ähnlich war’s, wann mer mei Pat Heiner in Auerbach besucht hann. Dort hat’s druckener Kranzkuche gebb, un mir sinn anschließend brav dorchs Dorf schbaziert. Die Ausnahm war de Schbaziergang am Sunndaa dorch de Wald in die Fasanerie, awwer bloß, weil ich mer dort hab e Reschdaurationsbrod beschdelle derfe. Des war korz noh de hungrische Johre e kulinarischie Sensation, die mich fer’s Schbaziere mitsamt de Sunndaasklamodde entschädischt hat.

So ännre sich halt die Zeide. Heit dääd ich mich denne scheinheilische Schbazierer ah net wejem dickschde beleeschde Brod anschließe.