Do bische platt 
Die Ami sinn zu de Frauleins in de Ixemer Schdroß geschlich
Seit demm Johr schreibt de Ilja Tüchter, des is enner vun de RHEINPFALZ-Redakteure, reschelmäßisch e Ameriga-Briefche fer sei Zeidung un zwar in zwee Sprache. Nee, net was ihr jetzat menne, in Schriftdeitsch un in Pälzer Mundart, sonnern in Deitsch un in Englisch, un mer kann’s im Internet lese. Er nennt sei Beiträsch „Tüchter’s 51 States“, also „em Tüchter sei eenefuffzich Schdaade“. Jetzat weeß nadierlich e jeder, dass die USA bloß 50 Schdaade hann. Ei bassen uff: De 51. des is unser Ländche, die Palz (jo, weje mir ah Rheinland-Palz). Dodemit will de Ilja saan, dass mir e ganz besunnerie Vebinnung zu de Schdaade hann, un dodriwwer vezählt er dann ebbes. Zum Beispiel, dass die Leit vun Afghanistan noh Rammsteen gefloo worr sinn.
Die eng Beziehung hat schunn am 20. März 1945 angefang: Do sinn die Amis in Zweebricke inmaschiert, des sechs Daa sevor in Grund un Boddem gebomt worr is. Es gebt e Foddo, do schleiche die GIs dorch die Ixemer Schdroß, also genau dort, wo se korz druff mit ihre Dollars zu de Frauleins in de Bars geschlich sinn. Schunn in de fuffzischer Johre hat’s geheeß, die Palz wär e Fluchzeichträscher un de 49. Staat vun de USA (Hawai un Alaska hann do noch net dezu gehört).
Es war awwer ah schunn umgekehrt. Midde vum 19. Johrhunnerd sinn dausende vun Pälzer niwwer noh Ameriga, die mehrschde noh Texas. Dort is es drunner un driwwer gang, die Texaner ware noch selbschdännisch, wollde awwer zu de Veeinischde, die Mexikaner ware ne desweje bees, die Indianer hann grad mol widder es Kriegsbeil ausgegrab, un jeder hat jeden massakriert. Do war’s e Pälzer, der für Ordnung gesoit hat: De Hans Meusebach hat mi de Comanche, die domols die Wiedischde vun all ware, Friede geschloss, un schunn war Ruh.
Es is e paar Johr her, do bin ich mit meim Sohn Norman quer dorch Texas gefahr. Er hat besser englisch geredd, ich kenn mich besser mit de Indianer aus. Die Städtcher, durch die mer gefahr sinn, heeße Luckenbach, Fredericksburg, un enns sogar Börne, noh dem Schriftsteller, der in Paris gelebt hat, Mitglied im Zweebricker Vaterlands- un Pressverein war un enner vun de Redner uffm Hambacher Feschd. Un was hann mer uns gefreet, wie mer uff em große Schild geles hann: „Big Pälzer Worschdmarkt“, net geloo. Leider hat der Worschdmarkt erschd e Woch schbäder angefang. Werklich schad, mir hädde gern midde unner de Cowboys un Comanche unser Feierowendschöppcher gedrunk un e Brodworschd dezu gess. Do hammer halt gesung: Mir sinn die Tramps, Tramps, Tramps vun de Palz; un sinn weitergezoo.