Do bische PLatt Der kleene Sandstrand am Exe macht em Freibad Konkurrenz

Ich muss mol widder de UBZ e Kompliment mache: Unser Kleener Exe is e Spielparadies worr, un die Fraue un Männer in de orangschene Overalls halle alles tipptopp in Schuss. Wann die Sunn vum Himmel scheint, summt’s un brummt’s dort wie an em große Bienestock.

Der kleene Sandstrand neewem Brickche zum Schulhof macht inzwische em Freibad an de Schließ Konkurrenz: Mit odder ohne Badehos traue sich die Krutze in de Bleecherbach, planche, spritze sich un juugse aus voller Kehl vor lauder Iwwermut. So muss es sinn. Es Angebott an Kledderfelse, Schaukele, Rutsche, Sandkäschde, net se vegesse die Skaterbahn un de Bolzplatz, is groß un werd ah genitzt.

Was die Kinnercher awwer vor allem brauche, des is Freiheit un Platz fer se renne un se doowe, fer sich se vesteckele un ah mol Unsinn se mache. Mich wunnerd desweje, dass net meh uff dem Inselche im Bach gespielt werd. Vielleicht sinn dodran die Muddis schuld, die ihr Kinnercher net iwwer die Wacke balanciere losse. Alla, ihr Buwe un Mäde, losse eich net gängele, nix wie niwwer uffm Robinson sei Insel!

Ich hab geles, dass se in Nirnbersch die Kinner bei de Spielplätz mit entscheide losse. E gudie Sach, weil die Welt vun Kinner viel reicher is wie die vun de Erwachsene, die all gern im rechde Winkel denke un iwwerall Gefahre un Grenze siehe. Wann ich mich an mei Kindheit erinner: Mir hann nix ausgeloss, hinner jedem Eck e Abenteuer, immer was erlebt, in Glasscherbe hat sich es Sunnelicht gebroch, mit em Brennglas hat sich e Flämmche zindele losse, mir hann mit de Hund un Katze vezählt, de Ball veflucht, der in die Scheib gefloo is, iwwerall Geheimnisse, de Vollmond hat e Gesicht gehat un mir unser Orakel, ohne des Wort se kenne. Daa fer Daa ganz großes Welttheader un immer was zum Staune. Die Lehrer hann vesucht, uns des alles auszutreibe, awwer Peifedeckel, mir hann standgehall.

Un desweje is es e guudie Idee, die Kinner se frooe, wann mer ebbes fer se mache will. Bei de Feriefreizeit in Lamschbore zum Beispiel hann die Lauser es Kommando gehat, wie’s drum gang is, Baumhaisjer se baue. Des war ah fer uns frieher es schenschde Abenteuer: e Haisje, wo mer ganz fer uns ware.

Mir hann’s domols leicht gehat: Die ganz Stadt war e Trimmerhaufe un hat aus Höhle un Veschdecke beschdann: In de Ruine un in de Kellerlöscher, do hat mer net viel nohhelfe misse. Un Maderial zum Baue hat’s genunk gebb, Backsteen, Zischele, Dachbapp, Ladde un Balke. Mir hann in die Hänn geschbauzt, die Ärmel hoch gekrembelt un losgeleet. So hann mir domols e wischdischer Beidrach zum Wiederaufbau vun unsrer Stadt geleischd.