Do bische platt 
De Paul glabt an die Veschwörungsmärcher: De Laschet will uns an die Chinese vekaafe
Ich fiehl mich wie neigebor, hat sich de Bruno gefreet, endlich widder Gäschd an de Thek, alles wie frieher zu de gude alde Zeide vor de Corona. Mir hann se dritt zammegehockt, de Paul, de Bruno, unser Wert un ich un hann eenfach Spaß gehat. Ich hätt nie gedenkt, hat de Paul gemennt, dass mer eier dummes Geschwätz so fehle dääd, un e großer Schluckk vun seim Feierowendschöppche genomm. Hoffentlich bleibt’s jetzat so, wennischens bis zum Hebschd, do werd jo sowieso alles annerschder.
Ei warum soll dann do alles annerschder werre, hab ich gefroot. Ihr werre schunn siehn, hat de Paul gesaat, es fangt dodemit an, dass die Merkel uffhört un widder heemflieht. Ei es wär jo kee Geheimnis, dass die e vemoddeldie Eidechs vum Saturn wär, die in geheimer Mission uff de Erd ihr Unwese gedribb hätt. Sei Monache hätt des im Intenet geles. Ei Paul, bisch du dann ganz verickt, hab ich gescholl, wer glabt dann so dumme Ammemärcher. Guck owends die Tachesschau, do weeschde, was in de Welt bassiert. Im Fernsehe bringe se die Fakde!
De Bruno hat derweil in enner Zeidung gebläddert un sich selbert laut vorgeles: Em Abraham Lincoln sei Mudder is vun Vampire ermord worr, na sowas. De Paul hat sich net err mache losse: Vun weeche Fakde, die vezähle uns net alles. Im Internet war geschder e Foddo, do hasche de Laschet direkt newe dem neije Mao in Peking gesiehn, wie er denne Chinese bei de Parad zujubelt. Ich hab schunn immer vemut, dass der heimlich zu de Gelbe gehört un als Kanzler denne unser Land vekaafe will. Ei hör doch uff mit dem Quatsch, hab ich ne unnerbroch, sie hann doch geschder alles im Fernsehe gezeit, un do war weit un breit kee Laschet neewe dem Xi Jinping se siehe.
De Bruno hat als in seiner Zeidung geblädderd un vorgeles: De Wolverine will sich vun seim todkranke Freind veabschiede, abber die Mutantin Viper hat Böses im Sinn. Also Leit gebt’s!
Weeschde was, hab ich mi’m Paul gescholl, des sinn alles bleede Veschwörungstheorie, was du do vezählsch. Du musch die Informatione aus de Zeidung un ausm Fensehe nemme, un net aus denne Fake-Seide im Intenet.
De Bruno hat uns anscheins net zugehört un gemurmelt: De Loui zieht ins Haus vun seim Unkel un weckt dort de Geischd vun enner Hex ausm Middelalder, die die Welt venischde will.
Saa mol, Bruno, hab ich ne unnerbroch, was leeschd du dann do fer e verickdes Zeich? Fangsche jetzat ah mit dem Veschwörungskram an? Ei bass uff, hat er gemennt, ich hab bloß geguckt, was die Woch so alles an Filme im Fernsehe kommt. Do kann’s em Angschd un Bang werre, was do alles gezeit werd.