Do bische platt De Othello soll jetzat Anton Wilhelm heeße

Kenne ihr de Martenstein Harald? Macht nix, mir sinn Kolleesche, de Harald un ich, all die Weil er ah jedie Woch e Gloss in enner Berliner Zeidung schreibt. Er sieht des mi’m Kolleesch wahrscheinlich net so, weil er sei Gloss net Gloss nennt, sonnern Kolumne, des klingt gescheider. Un er schreibt net in Mundart, sonnern in feinem Deitsch. Mir ware sogaa mol Nochbarn in Berlin in Prenzlauer Bersch, sinn uns awwer nie iwwer de Weesch geloff. Mit annere Worde: Ich kenn ihn, er mich awwer net.

Mir sinn ah gedanklich Nochbare. Denn er ärschert sich iwwer die Owwerlehrer genau so wie ich. Uff Neideitsch saat mer zu denne „Cancel Culture“, ich menn awwer, Owwerlehrer dääd’s besser treffe, weil se uns wie dumme Schieler behannele un uns de Mund vebiede wolle.

De Harald hat sich driwwer amüsiert, dass die Berliner Owwerlehrer sich an de Mohrestroß gestört hann. Des is e Sträßje in de Näh vum Schandarmemarkt un heeßt so seit 300 Johr, kenner weeß, warum. Seit Korzem is des Wort „Mohr“ fer die Owwerlehrer e Unwort, des mer nimmie saan derf, weil’s rassisdisch wär. Desweje hann se die Mohrestroß umbenennt in „Anton-Wilhelm-Amo-Straße“. Kee Mensch weeß, wer de Anton Wilhelm war, vielleicht außer e paar Owwerlehrer. Die Konsequenz: Sie misse alle Schilder, ah die vun de Ubahn-Station, die ah so heeßt, auswechsle. Die Berliner reesche sich desweje net arisch uff, weil se wisse, wie langsam ihr Vewaldung schafft. Un wer weeß, vielleicht is in e paar Johr „Wilhelm“ e Unwort, un mer muss sich widder was Neijes infalle losse.

De Harald hat jetzat e besserie Idee: Mer sollt aus de Mohrestroß enfach e Möhrestroß mache, do braicht mer bloß zwee Pinktcher iwwers o se setze un ferdisch. Ich finn des genial. Weil mer jo als Owwerlehrer weider denke muss: Was is dann zum Beispiel mi’m Othello, dem Mohr vun Venedisch? Soll der jetzat ah Anton Wilhelm heeße? Die besser Lösung wär doch: Othello, die Möhr vun Venedisch. Un zum Mohrekopp, der jetzst ah nimmie so heeße derf, saa mer Möhrekopp, do sinn ah die Veganer sefriede.

Die Owwerlehrer hann sich erschd recht an dem Klassiker vum Joseph Conrad mit dem Tiddel „Der Nigger von der Narcissus“ gestört. Jetzat heeßt des Buch „Der Niemand von der Narcissus“, kee Witz! Denne schwarze Matros, um denne’s do geht, zum Niemand se mache, is jo ah net die fein Art un macht gaa kee Sinn. Die Owwerlehrer lehe halt kee Wert uff de Sinn, es soll nur ähnlich klinge. Un do hätt ich e besserie Idee fer de Buchtiddel: Mir dääd „Die Nilgans vun die Nazis“ gefalle. Ich schreib jetzat glei mol em Berliner Kolleesch , was der devunn halt.