Zweibrücken De Kandonsmetzjer hat die Wahlworschd gebrung

Also ihr misse wisse, dass die Bolidik net so mei Ding is, un ich viel lieber iwwer de Paul, de Bruno un die Feierowendschöppcher schreib. Heit will ich awwer nochmol e Ausnahm mache, weil mer vor enner Woch e neier Stadtrat un dezu fer Europa gewählt hann, un des bassiert jo net alle Daa. Desmol hann sich jo viel Leit fer die Briefwahl entschied. Ei kee Wunner: Do hasche zwar noch e bissje meh Babier dorchselese gehat, hasch dich awwer mit denne ganse Unnerlaache gemiedlich uff de Balkong setze un in aller Ruh dei Kreizjer mole kenne. Un es heeßt jo serecht: Demokradie is net enfach. Des siehsche schunn dodran, dass widder e Haufe Wahlzeddel ungildisch gewest sinn. Un in de Wahlkabine hat`s de een un de anner Nervezammebruch gebb. Daa un Nacht hann se im Rathaus die Stimme gezählt, es war faschd so spannend wie domols zwischem Schorsch Dabbelju Bush un`m Al Gore, als se in Florida iwwerhaupt net ferdisch worr sinn un angeblich heit noch zähle. Frieher war des net gans so kompliziert, do hat mer noch net kumuliere un panaschiere gekennt; dodefor hat die Wahlbeteilischung bei 80 Prozent gelee! Wie ich domols mit eenezwansisch es erschde Mol wähle gederft hab, war noch viel meh annerschder. Unser Wahllokal war im Sälche vum Gasthaus Storche, also direkt newe meim Elternhaus, do hasche dich net velaafe kenne. Schunn desweje net, weil domols die Padeie vorm Wahllokal e Wald vun Plakade uffgestellt hann. Vier Johr späder war ich dann es erschde Mol Wahlhelfer, un zwar de Jingschde im Lokal. Es war e nasskalder Novembersunndaa, un mer ware froh, dass midde im Raum e großer Kanoneowe gestann hat. Un denne hat de Pimpf, also ich, mit Briketts un Holzscheide fiddere misse, demit mer`s ordentlich warm gehat hann. Zwischedorch hat mei Oma de Kopp zu de Dier ringestreckt un mich gefroot, ob ich ah net friere duu un se mer e Pullover riwwer bringe soll. Wann die Leit ihr Zeddel in die Urn geworf gehat hann, sinn se gern noch e Weilche geblibb un hann sich uffgewärmt. Korz noh Middaa is de Metzjer Kennerknecht vum Fasaneriebersch mit seiner gans Familie erschien un hat uns die Wahlworschd gebrung, e Korb voll Hausmacher un Lyoner. Des war es Signal fer die Wirtin Frau Weisenstein, die glei de Wahlkaffee dezu kredenzt hat. Dann hann mir Wahlhelfer`s uns gemiedlich gemacht un geveschbert; bloß ich hab uffbasse misse, dass es Feier im Owe net ausgang is. Un so is de Wahldaa im Kandon guud rumgang, un mir hann net Hunger un Dorscht leide misse, egal wie die Wahl ausgang is.