Zweibrücker Mundart-Kolumne 
De Januar muss krache, soll de Friehling lache
Es is doch kee Idee se bleed, wie dass se sich net enner ausdenkt. Jetzat gebt’s im Internet e Grippche, des de ersche Monat im Johr in Veganuary umgenennt hat: Mir solle all minanner im Januar Veganer werre un’s dann ah fer’s ganze neije Johr bleibe! Eischentlich dääd sich do besser de Februar eischne, wann mi’m Aschermittwoch (der desjohr in de März gerutschd is) sowieso die Faschdezeit anfangt, wo mer kee Fleesch esse soll. Awwer nee, solang wolle die eschde Veganer net waade.
Aller, es is jo was dran, dass mer am Johresenn e Haufe Fleesch vedrickt un’s anschließend bieße muss, vor allem an de Weihnachde, wann die Gans uff de Disch gefladdert kommt. Frieher hammer an so’m Gänsje e gansie Woch unser Freed gehat: se’erschd als Gänsebrode mit Fillsel, Klös un Rodkraut, am nächschde Daa die Reschde als Gänseklein mit Schbätzle un Endivschesalad un dann ah noch e Zeit lang zum Friehschdick als Gänseschmalz. Des Wort „vegan“ hat mer domols noch net gekennt, vor allem net an de Feierdaa.
Gekocht, was im eischene Keller war
De Anfang vum Johr war schunn frieher die Zeit, wo mer am Esse gern geschbart hat, schließlich hann die Feierdaa e Haufe Geld koschd. Vor allem is gekocht worr, was im eischene Keller war: Grumbeere aus de Kischd, Sauerkraut aus’m Fass, es Ingemachde aus de Weckgläser. Die Internet-Veganer wäre begeischderd gewest. Awwer kee Grund, jetzat dem Januar Gewalt anseduun un sei scheener Name so se vehunze; der schdammt nämlich vum römische Gott Janus. Frieher hat mer zum Januar ah Hartung un Eismond gesaat, do komme die Veganer werklich net mit.
Un es gebt e Haufe scheene Schbrichelcher iwwer de erschde Monat im Johr: De Januar muss krache, soll de Friehling lache; grabt de Mauerwolf im Januar, dauert de Winder noch e Verdeljahr; im Januar schunn Muckedanz, verderbt die Ernt im Summer ganz. Do missde die Veganer halt reime: Knurrt im Veganuary de Panz, fiehlsche dich in de Fasenacht leichder beim Danz. Aller ich weeß, ich hab schunn besser gereimt.
De Eismond basst ganz gut zum Winder
Die Östreicher saan iwwrischens Jänner zum Januar, des kammer akzepdiere, die wissen’s halt net besser. Mir gefallt de Name Eismond gut, weil der halt zum Winder basst. Wann’s ah kaum noch e rischdischie Eiszeit mit knackische Minusgrade gebt. Do dääd Suddelmond besser basse, awwer des klingt jo faschd noch schlimmer als wie Veganuary. De Februar wär dann de Fasenachtsmond, de März de Oschdermond, de April de Gliggermond, weil do die Gliggersäsong anfangt, de Mai de Käwwermond un als so weider. Un fer die Veganer se ärchere, nenne mer de Juni de Brodworschdmond, weil mer uns do uff’m Pingschdmarkt die Brodworschd schmecke losse.