Zweibrücken De Hirt, der de Heiland net hat siehn wolle
Hanner gehört, was de Engel vekind hat? Das hann die Hirde unnerenanner gesaat. In Bethlehem is de Heiiland gebor. Nix wie hin, des misse mer siehn.
He, dussma, Freinde, hat sich do de Samuel gemeld, un was is mit unsere Schoof? Wollener die midde in de Nachd alleen losse? Des heeß ich e Hundsfott vun em Schoofherd, der sei Stab fortschmeißt, um vorm Heiland uff die Knie se falle. Morje is ah noch e Daa. Do ziehe wir all zamme mit de Herd niwwer un gucke, was an der Sach dran is.
Die annere ware empört: E Gottessohn losst mer net waade, Sami! De Herrgott duud schunn uff unser Viehcher uffbasse. Nee, hat de Samuel gemennt, wann heit Naacht sei Sohn uff die Welt komm is, dann hat de Herrgott Wichdischeres se duun, wie sich um e paar Schoof un Geeße se kimmere. Nee, gehje ihr bloß alleen.
Strafe des Herrn?
Die Hirde ware noch net ums Eck, do is e Lämmche gebor worr, un de Samuel hat’s mit Strau abgeriwwelt. Ball druff hann sich Lazeroner angeschlich, um Schoof se klaue. Awwer de Samuel net faul, hat se noh hartem Kampf in die Flucht geschlaa. Korz dennoh hat e Rudel Schakale es Lager angegriff. De Samuel hat sich mit seinem Hirdestab un mit bloße Hänn gewehrt, bis er die Viehscher vejaat gehatt hat. Er selwert war iwwel zugerischt und hat aus diefe Wunde bees geblut. Er hat drucknes Holz ins Feier geschmiss, die Schoofherd beruhischd un sich gans kabutt ins Gras geleet.
Dort hann ne die annere schwer verwund beim Feier gefunn. Mit Mieh hat er vezählt, was’m bassiert war. Siehsche, hann se gesaat, des hasche devunn. Des is em Herrgott sei Stroof, weil de net mit uns noh Bethlehem gang bisch un de Heiland net hasch siehn wolle. Do wär er e arisch kleenlischer Gott, hat do de Samuel gemennt, un ich hätt nix se bereie.
Er spürt keine Schmerzen mehr
Geje Morje hann se all beim Feier in diefem Schloof gelee; bloß de Samuel hann die Schmerze wach gehall. Do is nochmol de Engel erschien und hat leis zum Samuel gepischbert: Komm mit, de Heiland is ah fer dich gebor, ich fiehr dich zu’m.
Nee, hat de Samuel gesaat, ich bin se schwach, denn de Herrgott hat mich bestrooft, weil ich bei de Schoof geblibb bin. Nee, ich maan sei Sohn ah jetztat net siehn.
Du errsch dich, Samuel, hat de Engel gelächelt. De Herrgott hat dich net bestrooft, er will dich belohne. Jetzat is es de Heiland, der dich siehn will, de gute Hirt, der sei Herd net im Stich losst. Ei wann des so is, hat de Samuel gesaat un ah gelächelt, dann komm ich mit. Un er hat sich uff emool gans leicht gefiehlt un kee Schmerze meh gespiert, wie de Engel ne bei de Hand genomm hat.