Mundartkolumne: Do bische platt De Herzoch Krischan war Weltmeeschder im Bürokradismus

Jesses, is des jetzat e Hickhack landuff un landab weje der Gefahreabwehr. Hauptsächlich geht’s dodebei um die Hunde, die an die Lein misse, un um die Eckepinkler, die des nimmie mache solle. Dodegeje is jo nix se saan, awwer trotzdem krien sich die Gemeinderät in die Hoor. Die Battweiler schlaan jetzat e Kompromis vor: Leinezwang fer die Wildpinkler. Aller, wann se sich domit eenisch sinn.

De Hinnergrund vun dem Gerangel is allerdings e annerer: Mer will die Reeschelungswut, also de Bürokradismus, bekämpfe. Un do is was dran. Net alles, was veninfdisch is, muss gesetzlich gereeschelt werre. Es gebt jo ah de menschliche Anstand un die prakdisch Venunft. Denn enns is doch klar: Wer e Vebott uffstellt, der muss des ah kondrolliere, hat schunn de Lenin gewisst, un kann net uff de guude Wille vetraue. Un Kontroll bedeit nix anneres wie Bürokradie.

Annererseits is die Bürokradie halt schunn immer die Neewewirkung vun unsrer Zivilisation gewest un soll die Anarchie un’s Chaos vehinnere. Die Lösung is halt wie iwwerall uff de Welt die richdisch Ballangs. Un dodran fehlt’s halt. Lese bloß mol unser Friedhofsordnung, was do alles vebott is! Allerdings gebt’s fer Hunde kee Leinezwang, die derfe nämich erschd gar net uff de Friedhof.

Enns is allerdings net richdisch: Bürogradie gebt’s net ersch seit heit. Unsinnische Paragrafe sinn schunn lang in Mode. Wie ich Student war, un des is e Weilche her, hat’s im Strafgesetzbuch e Abteilung „Übertretunge“ gebb: dort war vebott, mit Schlidde ohne Deichsel se fahre, de Butzemer uff’m Trottoir ausseleere, mit Steen se schmeiße un als so weider.

Schunn zu Zeide vun unsre Herzöch war die Reeschelungswut e beliebter Sport. Unser allerliebschder Herzoch Christian de Verde war dodrin Weltmeeschder. Er hat seine brave Bürscher grad alles vorgeschribb: Augerechent de Krischan, der alde Schuldebuckel, wollt dodemit seine Unnertane e sparsamie Lebensart un e anstännischer Lebenswandel beibringe. In enner Veordnung geje die Trunkeheet sinn die Saufnase, awwer ah die Wertsleit, die ne seviel ausgeschenkt hann, streng bestroft worr. Außerdem war es Werfelspiel vebott. Demit bei Hochzeide un Taufe net iwwer die Sträng geschlaa worr is, hat er besrimmt, wieviel Gäschd mer inlaade derf, dass es Esse net zu üppisch ausfalle soll un em Parre nur ennie Iwwernachdung zusteht. Mit seiner Trauerveordnung hat er vebott, dass mi*m Leichimbs zuviel Uffwand getribb werd. Unn als so weider. So großzieschisch wie er in de Kuldur war, so kleenlich mit de Sidde im Alldaa. Die Hundelein hat er net ingefiehrt, die hätt sei Nachfolscher Karl Auguschd, de Hundskarl, jo glei widder abgeschafft. Iwwer e Vebott vum barocke Eckepinkle is nix bekannt.