Do bische platt Am wichdigschde ware’s Kofferradio un de Kamm

Es gebt jo denne böse Spruch: Pälzer in die Palz, Saarlänner in die Saar. Aller, es is jo net so gemennt, abber unser Nachbare driwwe hat des doch se denke gebb. Un desweje hann se e Aktion ’sicher schwimmen im Saarland“ gestart.

In Gerschem zum Beispiel hann die Grundschieler schunn die erschde Kurse absolviert un kenne jetzat schwimme, net bloß in de Saar. Als Grund gebbe se im Minischderium in Saarbricke allerdings an, dass in de Coronazeit die Schwimmbäder all zu ware un desweje die Kinnercher net zum Schwimme komm sinn. Die Wassersportfreunde bei sinn desweje ah arisch beunruhischd un beklaache, dass die Quote vun Nichtschwimmer enorm zugenomm hätt. Aller ihr Määde un Buwe, auf ins Schwimmbad, bevor die nächschd Coronawell odder die Sintflut kommt.

Wie ich in de Volksschul war, hat kaum enner vun uns schwimme gekennt. Mir hann trotzdem driwwe im Freibad im Schwarzbach unser Spaß gehat. Beim Bademeeschder Julius Messerle hasche Schwimmstunne nemme kenne. Do sinn die Kinner mi’m Schwimmgerdel an e Lein gebunn worr, die iwwer’s 80cm-Becke geschbannt war. Mei Freinde un ich hann zugeguckt, wie se sich im Wasser abgezabbelt hann, unn net mit Kommentare geschbart, bis de Bademeeschder uns fortgejaat hat.

Mit zwölf hab ich mer dann es Schwimme selbert beigebrung, weil ich in dem Johr es erschde Mol es Sportabzeiche gemacht hab, un dodefor hab ich 200 Meder schwimme misse. Bis ich mer des zugedraut hab, war de Summer erum, un mir sinn mit de VTZ noh Bermesens ins Hallebad gefahr. Des war fer mich Schwimmanfänger die Reddung. Es hat dort e 25-Meder-Bahn gebb, bei der die erschde fünf Meder noch fer Nichtschwimmer un desweje net dief ware. Also hab ich die erschd Streck nur so geduun un bin uff em Been unner Wasser gehickelt. So bin ich mit Mieh un Not acht mol bloß 20 Meder geschwumm un hab dodebei ungefähr zeh Lidder Wasser geschluckt. Awwer fers Sportabzeiche hat’s gereicht.

E Johr schbäder war dann alles annerschder: Im Summer 1956 is des neje Schwimmbad uff de link Seit vum Schwarzbach ingweit worr, un zwar vun meine Freinde un mir. Die Geschicht hab ich eich bestimmt schunn meh wie eemol vezählt. Jetzat hat des Schwimmerbecke uns gehört. Geschwumm simmer allerdings ah net arisch viel: Mir sinn vum Startblock aus nin gehubst un getaucht, hann uns gejeseidisch getunkt, die Mäde nassgespritzt, Wasserfang gespielt, sinn rausgegrawwlt un alles widder vun vorne. Zwischedorch hammer uns mit de zwee wichdigschde Utensilie die Zeit vedribb: mi’m Kofferradio un mi’m Kamm. Jede Summer hammer uns e gewaldischer Sunnebrand geleischd, weil die Sunnecreme nix fer rischdische Lausbuwe is. Un de Bademeeschder hat weje uns drei bis vier Trillerpeife in Fetze gepiff.