Do bische platt 
Am Bleicherbach proteschdiere die Entcher geje’s Ordnungsamt
Jede Morje dreh ich mit de Romi, unserm Hundche, die selb Rund: durch de Heckweesch nunner zum Bleicherbach, noh links in de Guldeweesch bis zum Brickche an de Eremidaasch un dann serick in die Landauer Stroß; e korzie Streck, awwer scheen un gemiedlich, un fer uns zwee Alde langt’s. Wie mer do neilich iwwers Briggelche am Bleicherbach komme, is dort an de Ladern e Mordspalawer. E Dutzend Endcher fladdere um de Ladernemaschd un schelle mit weit gespertem Schnawwel, was es Zeich halt. Wie mer näher komme, sieh ich de Grund fer denne Uffruhr: Drowwe am Maschd e Schild mit rodem Rand un dodruff es schwarzie Hand, die Fudder straut fer e Endche, e Daub un e Kräh. Awwer alles mit em rode Balke dorchgestrich, die Hand un die Diercher. Soll also heeße: Es Fiddere vum Feddervieh streng vebott! Un desweje hann sich die Endeschnäwwelr so uffgerecht.
Es hat schunn in de Zeidung gestann, dass mer in de Stadt die Daube net fiddere soll, weil’s dann zu viel werre un se iwwerall ihr Dreck hinnerlosse. Desentweje hat mr im Turm vun de Alexanderskerch e Daubehaus fer die prodesdandische Daube gebaut, wo die Viecher nischde un briede solle, demit mer des unner Kondroll hat. Die Kadolische solle demnächschd ihr eischenes Haisje drunne im Turm vun Heilisch Kreiz krieje.
Jetzat also ah e Fuddervebott in de Allee, allerdings net fer die Nilgäns, die Duckendcher un die Spätzjer, die sinn uff dem Schild net abgebild. Ich halt nix vun der Sach, wann ich ehrlich bin. In de Stadt gebt’s jo ah die Tafel, fer die arme Leit, demit die was se beiße hann, un des werd gelobt un unnerstitzt. Do sollt mer doch ah bei dem Viehzeich net so kleenlich sinn, jedenfalls net am Bleicherbach, wo fer die Diercher genunk Platz is un se fer ihr Dreck die Wasserspielung hann. Was freeje sich dort die Kinnercher, wann se die Endcher fiedere derfe!
Mir hann als Kinner frieher e viel engeres Vehältnis zu Brehms Dierlebe gehat. In de Gärde hinner de Haiser hat’s vun morjens bis in die Nacht geschnattert, gekräht, miaut un gemeckert. In unserm Hof hat e Hasestall gestann, un mir hann die Karnickel mit Grumbeerschale, Saudischdele un Kuhmaul gefiddert. Frieh morjens hann em die Gockel aus de Nochbarschaft geweckt. De Herr Eberle hat in de Storchestroß sogar e Gailche gehall, es Sonja, des mer als hann streichele derfe. Kee Mensch hat sich do um die Ende im Bach un die Daube uff’m Dach gekimmert, do hätt mer viel se duun gehat.
Also ihr Endcher, Krähe un Daube, mit mir kenne ner rechne. Ich werr demnächst unner des Vebotsschild e Zusatz anbringe: „Ausnahme: Mondaa bis Sunndaa von 8 bis 20 Uhr“.