Do bische platt 
Als Kinner simmer de ganze Daa in de Hitz rumgedoobt
Die Zeidung weeß alles, net bloß was geschder bassiert is un wie morje es Wedder werd, sonnern ah, wie de gesund un munder dorchs Lewe kommsch. Jetzat hann se uff de Seit „Ratgeber Gesundheit“ veroot, was mer bei der Hitz, die mer heier hann, rischidisch un falsch mache kann. Also: Mer soll sich net in de prall Sunn uffhalle, sonnern meh im Schadde hocke, sunsch kriet mer e Hitzschlach un werd ohnmächdisch. Wann’s doch mol jemande bassiert un er fallt um, soll mer ne net einfach in de Sunn leije losse, sonnern in de Schadde rolle un de Notarzt rufe. Bis de Dokder kommt, soll mer selbert viel drinke, demit mer net innewensisch ausdrickelt. Wammer sich erschöpft fühlt, soll mer mit demm uffhöre, was mer grad macht, un sich ausruhe, aber im Schadde, net in de Sunn.
Wie mir Kinner ware, simmer de ganze Daa in de Hitz rumgedoobt, ohne ah nur ennie Minudd erschöpft odder ohnmächdisch se sinn. Aller, mir ware halt vun morjens bis owens an de Schließ, awwer net im Schadde, sonnern im Wasser. Desweje hammer die große Ferie ohne Hitzschlaach iwwerlebt.
Un mir hann ah kee Problem demit gehat, wie mer nohm Schwimme die Ohre widder drucke kriet. Do hat in dem Ratgeber-Artikel gestann, mer sollt anschließend kee Kopphörer uff die Ohre stecke, des dääd die Durchlüfdung vum Gehörgang behinnere. Wann sich Wasser im Ohr gesammelt hätt, sollt mer sich uff die Seit leje un am Ohrläppche zobbele, des kennt helfe. Am beschde dääd mer sich awwer Stöpsel in die Ohre stecke, dann kennt nix bassiere.
So, jetzat gebbe mol acht, ihr gescheide Leid vun de Zeidung, wie mer des richdisch macht: Mer huppst uff em Been wie e orientalischer Springstorch iwwer die Wies, leet debei de Kopp uff die Seit, un schwuppdisch laaft des Wasser wie nix aus’m Ohr. Un Kopphörer odder Ohrstöpsel hann mir sowieso net gehat. Gedrunk hammer uff jeden Fall genunk. So wie mir im Wasser rumgedoopt sinn, hammer guud zwee Lidder devunn geschlickt, bis de Bademeeschder Messerle um sechs Uhr gepiff hat: Kinner unner verzeh Johr Feierowend!
Die Leit hann domols kee Ratgeber in de Zeidung gebraucht, weil se fer alles ihr Hausmiddelcher gehat hann. Mei eenie Großmudder hat immer in de Dasch vun ihrer Kiddelscherz e paar Keschde gehat, weil des geje Rheuma schitzt. Un sie hat ihr Leewe lang net iwwer Rheumatismus geklaacht. Die anner Oma hat dodran net geglaabt un baufdisch mit achzisch Rheuma kriet un des net se knapp. Do hat se sich nachts uff e Katzefell geleet, des sollt helfe. Aller, do steck ich mer doch lieber glei e paar Keschde in de Hossesack wie uff enner doode Katz se schlofe.