Mundart-Kolumne: Do bische platt Als die Amis noch do ware: Die Zehndollarnode hann im Strumpband gesteckt

Vor zwee Woche hab ich bei Facebook gelees, dass die Kreizberschkasern Gebordsdaa hätt. E Haufe Follower, wie des heeßt, hann sich gefreet un graduliert. Nerjens hab ich awwer lese kenne, wann genau des Jubiläum sinn soll un wie alt die Jubilarin worr is; des hat die Community offenbar net intressiert un is ah gaanet so enfach feschtsestelle. Weil die Kasern do drowwe uff de Höh jo schunn vun de Wehrmacht genitzt worr is. Nohm Kriesch hann sich dann im Summer ’45 die Franzose ningehockt un hann’s Turenne-Kasern genennt. Wie’s denne dort nimmie gefall hat, sinn se noh Auerbach umgezoo. Jetzat sinn die Amis nuff uff die Höh, hann ersch emol grindlich uffgeraimt un e Zentrum fer ihr Personal un die Logistik fer ganz Europa ingericht. Do erschd war’s die Kreizbersch Kasern un is des geblibb, bis die US-Army 1993 endgildisch abgezoo is.

In denne Johrzehnde hat sich dort owwe um die alde Kasernebaude e rischdisches Kleen-Amerika entwickelt mit allem drum un dran: Schul, Sportplatz un Sporthall, Kino, Clubs un dem scheene Kapellche, des mich immer an die Wild-West-Fime mi’m John Wayne erinnert hat. Un alle Stroße hann noh amerikanische Staade geheeß, Virginia, Ohio, Kentucky un so weider. Fer uns Halbstarke war am allerwischdichde de EM-Club. Mit meim Wehrpass hann se mich un mei Girlfriend dort enin geloss, mir hann unser Whisky sour getrunk, e Chili gess un zu de Musik vun de Rainbow Ranch Boys geschwoft.

Es Headquader vun de Army hat awwer drunne midde in de Stadt gelee: in de Ixemer Strooß. Vor allem am Payday, do is es in de Bars hoch hergang un de Silverdollar hat in de Kass geklingelt, die Zehndollarnot im Strumpband gesteckt. Heit is dodevunn nix meh iwwrisch, bis uff e ensischie klennie Bar, die unner Denkmalschutz steht. Un die 2nd Bridge Blues Band erinnert mit ihrm „Ixemer Stroß Blues“ an die alde Zeide:

Des war in de Silver-Dollar-Zeit,

do hatten’s unser Amis gaanet weit

un sinn fix in die Rue de la Ix.

Am Payday in de Ixemer Strooß,

war jedie Nacht de Deiwel los,

do danst die Hex uff de Rout sex mol sex.

Wann des de GIs langweilisch worr is, hann se uff’m Kreizbersch zur Abwechslung studiere kenne. Die Universität Maryland hat dort owwe e Campus ingericht, wo die Amis, die außer Kriesch nix gelernt hann, ihr Uni-Diplom hann mache kenne. So wie heit unser Studende drowwe in de Hochschul. Die komme viel se wennisch runner in die Stadt, werd gejammert. Do hab ich die Lösung: Mer sollt fer die junge Leit so e Art Ixemer Stroß fer Akademiker inrichde, des kennt funktioniere. Vor allem am Payday, wann die Studende ihr Bafög krien.