Landau Fernsehfasnacht

Die Fernsehfasnacht gheert zu dem, wu mer am beschte sieht, wie sich s Lewe in de letschte sechzich Johr verännert hot. Ich wääß noch gut, wie mein Vadder ganz in de Aafangszeite zufällich mol e bissel devu mitkriecht hot un uns am negschte Daach vorgschwärmt vun dere Sängergrupp mit ehre tolle Artistik, wu de Klavierspieler vum Hocker gfalle isch un weitergspielt hot. Es missen die Gonsbachlerche gewest sei. Vermutlich hot mein Vadder net gedenkt, dass er jemols selwer en Fernseher kriecht. Er hot en ach vorher net vermisst, awwer de Appetit kummt halt doch mit em Esse. Ää Programm hots gewwe domols un im Dorf waren drei Fernseher, zwää in de zwää gregschte Wertschafte un ääner bei me aagsähnene Bauer. Vierefuchzich warn mer als Buwe in ännere vun dene Wertschafte uf em Bodde ghockt un hän geguckt, wie Deitschland in Bern Weltmäschter wore isch. S Johr druf ischd Fasnacht im Fernsehe lousgange mit „Mainz, wie es singt und lacht“ un hot eigschlache wie e Bomb. Wie s Zwätte Fernsehe dezukumme isch, hän die e äächenie Sendung gemacht mit em Titel Mainz bleibt Mainz. Vieresechzich hot de Ernscht Necher s Humbatätärä rausgewwe un die Sendung hot dantweche e Stunn länger gedauert wie geplant. Mit fascht neunzich Prozent wars iwwrichens die hegscht Sehbeteilichung, wus je gewwe hot, Määnzer Fasnacht hot jeden Krimi als Stroßefecher ausgstoche. Ich häb des Lied am negschte Daach mit de Kinner in de Schul gsunge, do war nämlich an Fasnacht noch Unnerricht. Wie e paar Johr speeter die Sendung fascht die Bach nunner gange isch, hän sich die zwää Sender zammegedau, ehr Titel zammegelecht un im Wechsel die Iwwertrachung iwwernumme bis heit. Gut sou. Die Programme kannscht inzwische nimmie zähle un die Neie wie Bohnebeitel oder Franke mecht ich net misse. Fer mich awwer war diesjohr Köln des gregschte Erlebnis, Köln am schmutziche Dunnerschdaach, ausgerechelt Köln, wu ich kaum guck, weil ich nix versteh. Sou tolle Bands un glei sou viel findscht schunscht nerchends un des Singe hot mich an unser Juchend erinnert, wu mer noch zammeghockt war un sou uubeschwert gschmettert hot. Singe stirbt zum Glick doch net aus un ich häb mich echt gfräät, wieviel Frehlichkeit noch in uns stickt. Danke, ach an alle annere, klor wars!