Rheinland-Pfalz 
Dialekt-Kolumne: Drama am Opernplatz
E beliebtes Brettspiel weckt es Allerschlechdeschde in mir. So musses sei!
En Blick in unser Textarchiv hot mir vor Aache g’fiehrt, dass mich in knapp 13 Johr Pälzer Sunndaachszeidung ää Thema immer widder ganz b’sunners dief beriehrt hot. Es isch, wie will ich saache, die ganz groß Frooch, die ich noch kläre muss, die mir uff de Nächel brennt, die mich umtreibt nachts, wann ich in meim eichene kalte Schwääß wach werr un mein ganze Kerper zuckt un zittert.
Wie, um Himmels Wille, finn ich noch jemand, wu mit mir Monopoly spielt?
Es zieht sich durch mei Ärwett, durch mei Lewe, wie die Schnittwund vun emme Samurai-Schwert im emme Quentin-Tarantino-Film. Ich will doch blooß spiele! Un ich brauch Heilung.
De letzschde Versuch mit meine Mitbewohnerin hot dramatisch geend’t. Ich hab ihre vorher, wie jedes Mol, hoch un heilich versproche, nit in Lackschuh uff’m Disch zu steppe un kä Schmählieder uff sie zu singe, wann sie uff mei Schlossallee kummt. Ich hab Stää un Bää g’schwore, dass ich mir kä Zigarr aazinn un kä Dänzerinne kumme loss, wann sie bankrott isch. Awwer was will ich mache? Mei allerliebschdes Lieblingsspiel weckt halt es Allerschlechdeschde in mir: de Mattscho, de Graf Rotz, de Großkotz, de Keenich vun Großmogulischtan un Babbsackhause, halt de mieseschde Gewinner, wu mer sich uff de Welt blooß vorstelle kann. Es isch so schää.
Sie hot mich allerdings direkt nooch ihre letzschde Niederlaach in unserm allerletzschde G’fecht kalt lächelnd Blanko-Scheidungsbabbiere unnerschreiwe losse. Wirksam fer den Fall, dass ich in ihre Gechewart noch ää äänziches Mol die Werter „Monopoly“, „Opernplatz“ , „Wasserwerk“, „Hotel“ odder „alle vier Bahnheef“ in de Mund nemm (was bei de Urlaubsplanung enormi Umsicht erfordert).
Un mir bleibt blooß noch ää Hoffnung: e Pälzer Selbschhilfegrupp fer alle Stinkstiwwel, Mechtegern-Turbo-Kapitalischde un Charakterlumpe, wu wenigschdens äämol im Monat z’sammehucke un ääfach blooß Spass hawwe wollen. Als anonyme Monopolyker.
Wie sieht’s aus?