Rheinland-Pfalz Dialekt-Kolumne: De Rheinland-Pälzer un die Vollsperrung

Wer sehnt sich nit nooch Ruh un Friede? E Dankschää an en rheinland-pälzische Staatsbetrieb.

Kinnen Se sich noch an des Johr entsinne, wu e paar Daach lang in ganz Eiroba känn äänziche Fliecher hot starte derfe, weil in Island en Vulkan Staab g’spuckt hot? De Name will ich nit schreiwe. Es Rechtschreibprogramm hot schunn genuuch mit meim Pälzisch se du. Jedenfalls: Was war des fer e Hektik, fer e Panik! Mir kinnen nimmi flieche, weil die Asch die Fliecher absterze losst! Mir kummen nimmi vun A nooch B! Was hänn die Leit ihrn Urlaub verbasst un ihr Meetings! Es war en Rieseheckmeck un e Thema in alle Zeidunge.

Un dann hot uff emol änner in de Himmel geguckt en gemerkt, wie spektakulär des aussieht, wann der ganz leer isch. Ääfach blooß blau. Kä Kondenssträäfe, kä nächtlichi Lichtblinkerei. De Himmel, so wie er halt g’heert. Es war wunderbar.

Manschmool muss mer blooß de Blickwinkel ännere, un aus emme Drama werd e Gottesg’schenk.

De naddierliche Lewensraum

Nemme mer emol es Wirke vun de Strooßebauverwaltung in Rheinland-Palz. Unsern Landesbetrieb Immobilität (kurz: Limob) verwirklicht sich grad emol widder in de Vollsperrung. Es muss do en geheime Passus in de Landesverfassung gewwe, der besaacht, dass de naddierliche Lewensraum vun emme Rheinland-Pälzer de Stau isch. Odder velleicht wer’n die Chefs vum Limob ach denooch bezahlt, wieviel Leit sich weche ihne die Freck an de Hals ärchern – mit emme Extra-Zuschlaach, wann des in de letzschde Woche vor Weihnachte bassiert.

Awwer des isch naddierlich alles Bleedsinn. Mer muss vun de anner Seit druffgucke. Dann erscht werd en Schuh draus.

Ruhig un emissionsfrei

De Limob helft uns g’schunnene Seele, die Welt so zu erlewe, wie se sei soll: ruhig un emissionsarm, frei vun Laschder un Schwertransporte, frei vun Lifferwäche mit Schuh vun Zalando, frei vun Flixbusse, frei vun Tatü-Tata, frei vum Individualverkehr. E Welt ohne Laschder un Audos – so wie de liewe Gott sie erschaffe hot. Vollsperrung! Jeden Daach nei zu erlewe an ihre Lieblings-Bundesstrooß X. odder an de Haupteifallstrooß in ihr Lieblingseikaafsstadt Y.

Dankschää, Limob!

Geche dich isch de Eyjafjallajökull e Waisekind. Ich mään jo blooß.