Zweibrücken Ich kennt mich grad mol widder uffreesche
So sinn die Leit un vor allem mir Deitsche! Drei Daa lang hammer uns iwwer unser Weltmeeschder im Fußball gefreet wie die Schneekönische un dann gesaat: Jetzat langt’s mim Frohsinn, jetzat wolle mer widder e bissje schelle un maule. Un desweje reesche sich so viel iwwer denne Gaucho-Song uff un menne, des wär e Skandal un mir missde uns jetzder zur Abwechslung widder e bissje schäme. Ei losse mol die Kerch im Dorf! Die Weltmeeschder-Buwe hann drei Daa lang gefeiert un e paar Biercher gekippt, ware in Berlin halt guud druff un hann die Sau rausgeloss. Rischdisch so, ihr Buwe, des hann ihr eich vedient. Un dodebei hann se e gans kleen bissje iwwer die Schdreng geschlaa, des war alles. Ei die Gauchos hätten’s genau so gemacht, wann se gewunn hättn, was wedde mer! Alla, wann mer des Gaucho-Liedche bei de Wachner-Feschdspiele in Bayreuth gesung hätt, do hätt mer sich es Maul verreiße kenne. Awwer doch so net. Ei wie die Unsere domols 1954 in de Schweiz die Ungarn gekloppt hann, do hann se bei de Siecherehrung all minanner im Stadion die erschd Stroph vum Deitschlandlied gesung, un kenner hat sich dran gesteert, obwohl de velorene Kriesch grad mol nein Jährcher vorbei war. Awwer des Geknewwer hat jo schunn frieher angefang, wie die Mannschaft als in Brasilie die Hymne mitgesung hat. De Müller dääd se laut un se frech singe, hat’s geheeß, de Philipp Lahm viel se lahm, de Sami Kehdira iwwerhaupt net un als so fort. Ich dääd saan: E jeder halt noh seiner Fassong un so guud wie er kann. Mir Deitsche sinn eischentlich große Sänger, gell, un de Gesangverein is e deitschie Erfinnung un Tradition. Grad hat in Masswiller de kadolisch Kerchechor sei 150. gefeiert. Glickwunsch! De Martin Luther hat jo gemennt, de Gemeindegesang wär die Seel vun jedem Gottesdienschd. Bei uns Prodeschdande merkt mer allerdings am Sunndaamorje in de Alexanderskerch nix devunn. Do muss mer schunn in die Heilisch Kreiz gehe, dort schmettert de Parre Emanuel, dass sogaa de Luther sei Freed dran hätt. Es gebt allerdings Leit, die saan hinnerum, des dääd der Parre bloß mache, um die Krähe in de Allee se vescheiche, die ne jede Morje um finf Uhr wecke duun. Die Krähe geheere jo ah zu de Singvöchel, wammer’s ah net glei merkt. Sie singe halt eher so wie de Müller bei de Nationalhymne. Mei liebschdes Vöchelche is jo schunn immer de Buchfink gewest. Ei ihr werre’s net glaawe, der kann in Mundart singe. Net geloo, des is e Sänger, der je noh Reschion sei Liedcher e bissje annerschder zwitschert. Ei wie bin ich dann jetzat vun de Gauchos bloß uff de Buchfink komm?