Zweibrücken Wie de Ignaz Roth beinächschd ins Kittche komm is

Also de Robin Hood is des net gewest, der die 10 000 Euro aus de Schdatkass gemopst hat, hat de Paul geschdern Owend gemennt, wie mer beim Bruno an de Thek gehockt hann. Der hätt nämlich die Reiche beklaut, um`s de Arme se gebbe. Un dodezu dääd die Schdadt werklich net gehöre, zu de Reiche, bei denne viele Schulde. Nee, des war werklich e echt krummes Ding, so em arme Schlucker sei Notgrosche se klaue, simmer uns eenisch gewest. Dann hammer driwwer dischbediert, wo der Gauner des viele Geld veschdeckelt hann kennt. Des wär kee Kunschd, hat de Bruno, unser Wert, gemennt, der hat`s im Summerloch odder in enner vun denne viele Bauschdelle vegrab, do kennt die Schdaatsanwaltschaft lang suche. Un wann dann Gras iwwer die Sach gewachs is, buddelt der`s widder aus un macht sich e scheenes Leewe. Mer soll`s net glaawe, vor nix hann die Leit meh Reschbekt, net emol vor unserm Rathaus! Mol langsam, hab ich gesaat, vielleicht hat der Kerl des Geld gebraucht, um die Wiederkehrende Beiträch odder sei Hundeschdeier se bezahle, un dann kriet`s die Schadt jo widder serick, gell. Un außerdem hann die Schdadtowwere ah schunn emol mit em Been im Gefängnis geschdann. Des is allerdings schunn e paar Jährcher her. Un dann hab ich die Geschicht vezählt, was sich de Owwerbojemeeschder Ignaz Roth, de Baumeeschder Guschdl Groß un de Werkmeeschder Adam Engel domols nohm Kriesch ausgedenkt hann, um dabber die kabudde Leidunge in de Schdadt se repariere. Die Schdadtwerke hann am 14. März, wie Zweebrigge bombadiert worr is, aach e paar Volltreffer abkriet, un alles Maderial war zum Deiwel. Neije Rohre fer Wasser un Gas hädde erschd bei de fränsösisch Kommandandur beantracht werre misse, un des hätt gedauert. Desweje hann sich die drei Meeschdere die Aktion „Eichhörnche“ ausgedenkt: Sie hann bei Nacht un Newwel uff`m Schwarzmarkt Messingkartusche gehamschdert, se inschmelze losse un dann geje Rohre gefuggert, alles heemlich un völlisch illegal. Wann des ans Daacheslicht komm wär, hätte die Franzose de Ignaz, de Guschdl un de Adam minanner in de Milidärbulles geschdeckt. Awwer des Risiko sinn die drei Muskediere ingang, weil Not am Mann war un die Schdadt ohne Wasser un Gas net hätt iwwerleewe kenne. Unn sie hann`s tatsächlich geschafft, ohne dass die Franzmänner Wind devunn kriet hann. Schunn vier Woche, nohdem die Bombe gefall ware, hat die Inneschdadt widder Wasser gehat, un vorm Winder hann die Gasrohre gelee. Alla, hat de Paul gemennt, do waade mer jetzat mol, ob der Gauner mit seine 10 000 Euro vielleicht ach was Guudes fer die Schdat duud. Er kennt jo zum Beischbiel denne drei Helde vun domols e Denkmal schbendiere, glei neewe de neie Wassertrepp.