Kolumne: Do bische platt In de USA halle se de Shakespeare fer e Kinnervederber

In de ledschd Zeit steh ich immer öfder vor de Biecherregale un mach mer mei Gedanke. Im Unnerschied zu mir hann mei Biecher kee Vefallsdatum, iwwerlee ich. Was werd aus all denne Schwade, wann ich nimmie bin un mir mei Gedanke mache kann? Mit meine Kinner brauch ich net se rechne: Um Gottes Wille, Vadder, was solle mir mit so viel Biecher anfange! Mir hann deheem selbert viel se viel un kee Platz meh. Die selb Antwort krie ich vun de Freinde, die selbert net wisse, wohin mit de Bibliothek.

Ich hab bei de Stadtbiecherei un de Bibliotheka Bipontina gefroot. Nix se mache. Vielleicht, wann ich e Buch vum Guddebersch persönlich hätt, dann kennt mer driwwer redde.

Sogaa mei Kinnerbiecher krie ich net los. Die Enkelcher sinn zwar all minanner Leseratte. Die wolle awwer vun meine Schneiderbiecher nix wisse, weil do de Harry Potter net drin vorkommt. Biecher wegschmeiße? Also des dääd mer in de Seel weh. Des wär faschd so schlimm wie Vebrenne, e Kuldurschand. Aller, ich missd mol gucke, ob do net e paar ganz Letze drunner sinn, die’s werklich net wert sinn, dass se mich iwwerlebe misse.

Mer kriet jo als mol de schlimmschde Schamass geschenkt. Awwer meh wie e Dutzend odder zwee sinn des net. Des macht unner denne 3000 annere nix aus, des gebt e klennie Lück fer e paar Neie. Biecher vebrenne! De Ray Bradbury hat driwwer geschribb in seim wunnerscheene Buch „Fahrenheit 451“. Do muss ich mol widder ningucke. Un dann de Umberto Eco in „Der Name der Rose“. Wann immer Biecher vebrennt werre, is des e schlimmes Zeiche fer Unkuldur un Hass un Dummheet. Mir in Deitschland kenne e Lied devun singe, un so aarisch lang is des gaanet her, wie se de Heine, de Brecht, de Kästner un de Tucholsky, die all in meiner Bibliothek versammelt sinn, uff de Scheiderhaufe geworf hann.

Des ganze Zeich vom Cancel-Culture-Club

Un wann des mit dere verickde Cancel Culture so weider geht, wer weeß! In Florida hann se jetzat grad em Shakespeare sei „Romeo und Julia“ fer die Schul vebott, weje de sexuelle Iwwergriff, die do drin stehe. In annere Ecke vun de USA werd die Bibel zensiert, weje de Unzucht, die se dort entdeckt hann. Dass sich jeder Pimpf im Internet de schlimmschde Porno angucke kann, stört awwer offenbar net. Bei uns iwwerleje se, ob mer die Karl-May-Biecher noch lese derf, weje de Aneischnung vun de Indianerkuldur. Do isses bis zum Vebrenne bloß noch e Schrittche.

Nee, die Hänn eweg vun meiner Bibliothek! Ei was stehe do wunnerbare sexisdische Machwerke in de Regale, vum Henry Miller un Charles Bukowski. Awwer wann desentweje enner vum Cancel-Culture-Club an die Dier vun meiner Bibliothek kloppt, werd er m