Landau Noch emol devukumme

Ich häwwen mit zwää Händ hewe misse, mein Freund, de Franz, dass er net an die Deck hupst, awwer den halwe Hörsturz uf sein Plärrer hie häwwich net vermeide kinne. Vorm Bildschirm warn mer ghockt, hän die route Zahle fixiert un uns kän Muckser mäh zu mache getraut, wie de Halfar s ääns null gschosse ghat hot, blouß dass mer die Zahle net verschrecken un sie umspringen uf ääns ääns oder sogar noch uf ääns zwää. Unser Junge ticken annerscht. Die redden Houchdeitsch un schwärmen als Pälzer fer Gladbach oder Schalke. Awwer aus uns Alte bringscht die Lieb zum FCK nimmie raus un des isch gut sou. Ach wann die Kondition nimmie langt, fer uf de Betze nufzulaafe un wannd dich ach schun noch sou oft un noch sou arch geärchert hoscht, in dem Moment, wu aagepiffe werd, wannert s Herz samt em Geischt vun allää uf de hegschte Pälzer Berch. Dass verzichdausend jetzt drowwe waren, fer als zwelfter Mann im schwerschte Spiel vum Johr zu helfe, macht mich als Pälzer stolz, frouh un ach e bissel zuversichtlich fer die Zukunft. Die Lieb stammt noch aus de Kinnerzeit, seit de FCK zwääefuchzich Määschter wore isch. In ännere Wertschaft, wu heit wechem Brandschutz mit ämme Eisezaun hermetisch vun de Außewelt abgerichelt were det, warn mer uf em Bodde ghockt, mein Bruder, mein Freund, de Franz, noch e paar Buwe, ää Mädel un ich. Nufgeguckt hämmer uf en schwarzweiße Bildschirm, wu uugfähr sou grouß war wie e Briefmark, un getobt, dass sich die Deck geluppt hot. Des hot sich zwää Johr speeter widderhoult beim Endspiel in Bern, wu die Hälft vun de Weltmäschter aus Lautre kumme isch. In de Bundesliga hämmer dann oft genunk zittre misse. Äämol war ich debei uf em Betze am letschte Spieldaach, wus drum gange isch, ob Lautre absteicht oder Homburch. E ääns null hot uns gelangt, genau wie heit. Dodefor simmer in de neunzicher Johre mit zwää Mäschterschafte un zwää Pokalsieche belohnt wore. Dantweche kanns des doch net sei, dass mer uns jedes Johr frääen, wann mer in de zwätte Liga bleiwen. Raus missen mer, awwer raus nooch owwe. Vun de Tore her, wu mer kriecht hän, wärn mer diesjohr sogar ufgstiche, awwer blouß de KSC hot noch wenicher gschosse. Also: Die bundesligareif Abwehr hämmer, auf geht’s!