Ich mään jo blooss Weihnachte, onlein
„Un, simmer all onlein?“, frooch ich in de Bildschirm.
„Johu“, saacht mein Kumbel Fred. Es Bild isch e bissel verschwumme, awwer mer sieht ihn uff seine Kautsch hugge.
„Krxgrxtkkrx...“, macht die Dannde Liesel. Sie huggt uff ihre Eckbank, un mer sieht blooß en Arm.
„Ei jo!“, saacht mei Mitbewohnerin, obwohl se direkt neewer mir huggt.
„Do isch ebbes mit deim Mikrophon, Dannde Liesel“, saach ich. „Un du muscht e bissel määner in die Mitt vum Kommbjuuder rutsche.“
„Aachkxcrrx...“, macht die Dannde Liesel.
„Skål!“, ruft mein Kumbel Fred un schnippt middem Finger ans Rotweiglas. Die leer Flasch verdeckt jetzt es halwe Bild.
„Singe mer endlich?“, froocht mei Mitbewohnerin un klatscht uffgereecht.
„Achrrrrrchrxxxxxakarrrch...“, macht die Dannde Liesel.
„D-dannde Liesel, du m-muscht dei Mikroph...“, saacht de Fred.
„Ich muss gar nix!“, blärrt die Dannde Liesel. „Un fer dich Suffkopp bin ich immer noch die Fraa Liesel. Aaaachchrrxxx ...! E Gewittel, hab ich en Frosch im Hals.“
„Alla hopp“, saach ich. „Es muss jetzt emol vorwärts gehe. ,Ihr Kinderlein kommet’?“
De Fred schmeißt die leer Flasch um un stellt e volli newedraa. Er hantiert middem Korkezieher. „Iiiihr K-k-kiiiindeeerlein ...“, fangt er aa.
„Nix do!“, blärrt die Dannde Liesel. „Erscht kummt ,Stille Nacht’!“ Sie wedelt mit emme Blatt Babbier.
„Aha“, saacht mei Mitbewohnerin. „Die Dannde Liesel hot en Ablaafplan. Un ich wääß widder vun nix!“
„Schatz, ich hab e Rundmehl verschickt.“
„Heilichoowend. Mir zwää. Dehääm. Bei uns. Un ich erfahr’s per I-Mehl? Du hoscht doch änner an de Makron!“
„Genau!“, blärrt die Dannde Liesel. „Wu sinn dann eichendlich die Gebäcksle? Was isch’n des fer e Organisation? Wochelang babbelt der Erbschleicher vun ,Weihnachte onlein’, un jetzt klappt gar nix!“
„Sch-schti-hille Naaaacht ...“ singt de Fred un wiecht e Flasch St. Laurent im Arm.
„Mir zwää sinn noch nit ferdich, mein Freund“, saacht mei Fraa un guckt mich aa.
„Amadeere“, bebbert die Dannde Liesel.
Ich glaab jo, diesjohr werd Weihnachte bei uns wie immer. Ich mään jo blooß.