Do bische platt 
De Werner von Blon hat bei de Kanadier als DJ Schnulze uffgeleet
E Foddoausstellung am Sunndaa vor zwee Woche, des war ah schunn alles. Dodebei war des e richdisch lauder Anfang, wie an em scheene Summerdaa 1953 die erschde kanadische Sabres iwwer die Dächer vun unsrer Stadt gefeescht sinn. Mer hat denne Krach net noh Dezibel gemess, sonnern noh de Anzahl doode Spatze, die vum Himmel gefall sinn. Awwer ansunschde simmer mit unsere Kanadier un ah mit de Ami späder guud auskomm. Des hat mer in der Foddoausstellung alles angucke un sich erinnere kenne.
Bloß enns hat gefehlt: De Hillbilly Saloon Zweebricke! Des war unser Clibche, des mir Zweebricker Buwe gemeinsam mit de Airmen vum Kanadische Soldadesender CFNZ 1960 gegrind hann. Mir hann uns als mit denne Boys vun de Airbase uff’m Wallerscheid in de Näh vun em gesprengde Westwallbunker getroff, die Kanadier hann de Whisky mitgebrung, mir es Bier un die Girls, un dann hammer am Lacherfeier die Völkerfreindschaft ausprobiert. Wie gesaat: Vun dem Ursprung vun de Städtepartnerschaft mit Barrie war uff der Ausstellung leider nix se siehn.
De CFN war fer die Halbstarke, wie mer uns domols genennt hat, e Glicksfall. So hammer die musikalisch Revolution, de Rock’n’Roll, aus erschder Hand, odder besser gesaat: ins erschde Ohr, direkt miterlebt. In de Saturday Night Request Show hann de Hank Siemens, de Ron Gibson un wie die Diskjockeys all geheeß hann, die Pladde ah fer die junge deitsche Fans uffgeleet.
Dann hat sich allerdings enner als Trittbrettfahrer am Dienschdaa Owend mit enner Wunschsendung fer die brave Zweebricker Hörer ingeschlich un Schnulze vum Gerhard Wendland un de Katharina Valente gespielt: Des war de Werner von Blon, domols noch e Lehrer, aller, was konnt mer do schunn erwarde. Do hammer uns dabber die Ohre zugehall un abgeschalt. So ännere sich die Zeide: Was dääde mer heit defier gebbe, wammer die zwee noch hätte, de Werner un de CFN!
Ich selber hab domols defier gesoit, dass do drowwe uff de Höh alles sauber un in Ordnung war. In meine erschde Semeschderferie hab ich mich nämlich beim Fluchplatz-Office als Werkstudent gemeld. Sie hann mich zu de Constructing and Ingeneering Section ingedeelt, un ich hab mich arisch uff des Konstruiere gefreet. Wie ich mich mondaas in de Frieh dort meld, hann se mer e Bese in die Hand gedrickt, un ich hab die Stroße kehre misse, sechs Woche lang, fer zwee Dollar die Stunn, des war e Haufe Geld. Dodevunn war in der Ausstellung ah e Bildche: Uff em Foddo vun enner Parad vun de Nr. 3 Fighter Wing is ganz im Hinnergrund e klennes Kerlche se siehn, der die Stroß kehrt. Mer muss bloß genau hingucke.