Ich mään jo blooß Die SPD un die Macht – warum de Fall Raab blooß e Symptom isch
Die Noochricht vun vor zwää Woche hot fer mein G’schmack viel zu wennich Beachtung g’funne: Satte 80 Prozent vun de Delegierte uff’m SPD-Landesbaddeidaach hänn Aafang November widder fer de Roger Lewentz als Landesvorsitzender g’stimmt. Genau fer den Roger Lewentz, wu vor gut emme Johr als Inneminischter hot zuricktrete misse – weche Fehler in de Nacht vun de Ahr-Flut un bei de Uffarbeitung vun dere Kataschtroph un vun dem Bild, des unser Landesregierung dodebei abgewwe hot. Er hot bei seim Ricktritt kä eichene Fehler zugewwe, de Lewentz – so ebbes macht en Lewentz nit. Es wären Fehler „in seim Verantwortungsbereich“ bassiert, hot er g’saacht, un er deed jetzt halt die bollidisch Verantwortung iwwernemme.
Ich kumm do druff, weil em Lewentz sei peinlichi Drumrumredderei sellemols un es Wegschiewe vun de echte Verantwortung die Grundlaache defor sinn, dass er SPD-Vorsitzender hot bleiwe kinne un dass er sich jetzt sogar gnadelos hot widderwähle losse. Des beweist allerdings endgiltich: Des Ganze isch kä Ää-Mann-Problem, sondern ens vun de Baddei. Die Mitglieder hetten sich jo uff’m Baddeidaach – odder vorher – geche die Blamaasch wehre kinne.
Awwer mer muss naddierlich wisse: Machterhalt isch fer die SPD im Land es allerheggschte Gut. De Lewentz muss um jeden Preis Vorsitzender bleiwe, damit jetzt noch kä Entscheidung iwwer die Noochfolsch vun de Minischterbrässidentin fallt. Des deed nämlich de Amtsbonus vun de Dreyers Malu (SPD) b’schäädiche. Ab dem Moment wär die Fraa e „lahmi Ent“ gewest, wie mer des in de Bolledigg so nennt. Un de Noochfolscher oder die Noochfolscherin in spe wär als Vorsitzender ab sofort in de Schusslinie vun de Kritik g’stanne. Des Problem hot die SPD ääfach uffg’schoowe – halt blooß zu dem Preis, dass die Baddei jetzt ziemlich erbärmlich dosteht.
Was mich am määnschde fasziniert an dere ganze Sach: Die SPD im Land kapiert nit, dass jeder merkt, was do laaft. Sie määnen, sie kummen dodemit durch. Nooch 32 Johr an de Macht glaabt die Sozialdemokratie im Land allen Ernschtes, des Ganze wär so ebbes wie e naddierlichi Ordnung, die vun nix un niemand g’steert werre derf. Un do basst dann perfekt ins Bild, dass die Heike Raab als SPD-Staatssekretärin (fer Medien un so) beim Siedweschtrundfunk dicke Ärm macht, wann dort harte Worte iwwer de SPD-Vorsitzende Lewentz zu heere sinn. Emol unner uns: Die Fraa macht ganz ääfach ihrn Dschobb. Ich mään jo blooß.
Michael Konrad schreibt die Kolumne „Ich mään jo blooß“ seit 2007 für jede Ausgabe der RHEINPFALZ am SONNTAG und immer auf Pfälzisch. Das Buch zur Kolumne („Ich mään jo blooß: De Ding“, Lipplerbookz, Annweiler, 2022) gibt es zusammen mit allen anderen Büchern des Autors („Saach blooß“, „Können Sie Pfälzisch?“) im Buchhandel und hier im RHEINPFALZ-Shop.
