Rheinpfalz Die TV-Debatte. E Rollespiel.

Mei Mitbewohnerin isch die Malu Dreyer, die Dannde Liesel isch die Julia Klöckner, ich bin die Grüne (un de SWR), un mein Kumbel Fred isch die AfD.

„Ich will nit die Klöcknern sei!“, blärrt die Dannde Liesel. „Warum muss ausgerechent ich die Dreyern mache?“, froocht mei Mitbewohnerin. „Jesses, des isch doch blooß e Rollespiel“, saach ich, „es geht nit drum, wer wer isch. Es geht drum, dass mir de Leser erklären, wie des die Woch war mit de geplatzte TV-Debatte vum SWR.“ „Ohne mich!“, blärrt die Dannde Liesel, also die Julia Klöckner. „Ohne mich!“, saacht mei Mitbewohnerin, also die Malu Dreyer. „Doch jetzt noch nit!“, ruf ich zwischenei. „Jetzt heeren mir doch emool zu! Erscht missen mir zwää“ – ich zeich uff mei Mitbewohnerin un mich, also uff die Dreyern un uff die Griene – „also mir zwää missen ausmache, dass mir blooß uff die Prunksitzung gehen, wann de Fred nit mitkummt.“ „Awwer ich bin doch beim Männerballett!“, saacht die AfD, also mein Kumbel Fred. „Genau“, saach ich. „Un weil de Fred im Männerballett isch, saachscht du jetzt ...“ ich guck zu meine Fraa. „Ohne mich!“, saacht die Malu Dreyer. „Subber, Schatz!“, saach ich. „Vergess es!“, saacht die Malu Dreyer. „Ich bin längscht raus aus deim dabbiche Rollespiel. “ „Ich! Mach! Eich! Nit! Die! Klöcknern!“, blärrt die Julia Klöckner, ääh, die Dannde Liesel. „Halt emool! Du bischt immer noch nit draa!“, ruf ich dezwische. „Erscht kummt doch noch de SWR, also ich, un ich schmeiß de Fred, also die AfD, aus’m Männerballett, un dann erscht kummscht du, Dannde Liesel ...“ „Warum muss eichendlich ausgerechent ich die AfD sei?“ froocht die AfD, also mein Kumbel Fred. „Hawwich ebbes falsch gemacht?“ „Wu isch dann iwwerhaupt mei FDP?“ froocht die Julia Klöckner, „ohne die un ohne e Konnjäggel geh ich uff gar känn Fall uff die Fasnacht!“ „De Kaader licht drowwe uff de Kautsch“, saacht die Malu Dreyer. „Der isch in de Apo. Was soll dann der uff de Prunksitzung?“ Ich habb dann die ganz Baggaasch aus’m Wohnzimmer g’schmisse. So war des mit de geplatzte TV-Debatte. Ich mään jo blooß. (mk)