Do bische Platt Wer weeß heit noch, was e Lehmche un e Achadche is?

Es Fernsehe werd immer kinnischer. Jetzt gebt’s owends im Hauptprogramm Sendunge fer Erwachsene, die eischentlich in die Sesamstroß geheere. Do spiele se Fange un Gligger, nadierlich mit ganz dolle Name: Catch un Murmelmania! Irschendwann kommt dann Veschdeck-dich dezu un vielleicht ah „Herr Fischer, wie dief is des Wasser“ un „De Kaiser schickt sei Soldade aus“. Wahrscheinlich hann die vun de Sender in ihrer Programmkommission lauder Achtjährige hocke. Dodezu basst dann ah, dass e Antrach gestellt worr is, es Seelspringe als olympische Disziplin zuselosse. Des hat nadierlich jetzat e schicker Name kriet: „Rope-Skipping“ odder so ähnlich, un soll ins Turnprogramm uffgenomm werre. Weil’s awwer halt bloß vun de Määde gehoppst werd, so wie des schunn frieher uff’m Schulhof Mode war, soll als Ausgleich fer uns Buwe es Kerschekernweitschbautze nei ins olympische Programm komme.

De Hossesack voller Gligger

Ob die Kinnercher heit iwwerhaupt noch wisse, wie mer mit Gligger spielt? Jetzat im Friehjohr hätt domols die Gliggersäsong grad widder losgeleet, un die Erwachsene hätte uffbasse misse, dass se net in e Gliggerloch nintabbe un sich die Haxe vedreede, weil jedes Trottoir unser Gliggerarena war.

Schunn morjens uff’m Weesch in die Schul hab ich de Hossesack voller Gligger gehat: e gudes Dutzend Lehmcher, um demit in de groß Paus se gliggere, un zwee odder drei Achadcher, um demit ansegebbe. Fer die heidisch Juchend misst ich jetzat erkläre, was Lehmcher un was Achadcher sinn. Awwer ihr wisse do jo all Bescheid, desweje kann ich mer das spare.

Ei ich hab in de Zeidung geles, dass se in Daaleschwiller e ganzie Scheier zu em Spielhaus ausgebaut hann, wo sich die Junge ausdoowe könne. Was fer e Menggengges! Des hann mir frieher halt net gebraucht, mir sinn im Trebbehaus rumgeturnt un wie de Blitz es Gelänner nunnergeritscht, des war uns Spielhaus genunk. Un es Gelänner is vun unsre Ledderhose blitzblank poliert worr, ohne dass mir was defor velangt hann.

Das ware die schenschde Spielplätz

Genau so isses mit denne dolle Spielplätz in de Stadt, die e Haufe Geld koschd hann. Mer hätt domols nohm Kriesch eenfach so e paar Ruine stehe losse solle, des ware fer uns die schenschde Spielplätz. Aller, so ganz ungefährlich war’s nadierlich net un deshalb ah vebott, dort rumseschdreunere. Awwer vebiet mol em Lauser es Spiele. Des is grad, als dääd mer em Ochs ins Horn petze.

Des mit dem Spielhaus is vielleicht doch kee so schlechdie Idee. Do soll’s dann e Spielassistent odder Spielassistentin gebbe, die de Kinner es rischdische Spiele beibringe. Wie mer sich also vesteckeld, uff e Baam grawwelt un sich die Hosse vereißt, sich ordentlich dreckisch macht; alles so Sache, die’s Internet net biete kann. Un vielleicht lerne dann die Kinnercher ah, was e Lehmche un was e Achadche is.