Kolumne Do bische platt: De gröschde Götterbaam steht bei mir im Gaade

Die Saarlänner sinn bekannt defor, dass se gern iwwertreibe. Ich weeß des, weil ich selbert e halwer Saarlänner bin: Mei Muddi un ihr Familie stamme all vun driwwe. Demit ich’s mit dem Iwwertreibe net iwwertreib, hat mei Muddi mei Vadder geheirat, der aus Bermesens kommt. Sie hann sich uff die Mitt geeinischt, sodass ich in Zweebricke gebor bin, nah an de Grenz, awwer halt doch noch e Pälzer.

Serick zum Thema: Die Saarlänner iwwertreibe gern un oft. Sie menne, sie hätte die Lyoner erfunn, dodebei stammt die aus Lyon un heeßt dort Cervelas. Un ah die saarlännisch Lieblingsdroge, es Maggi, is net vun de Saar, sonnern ursprünglich in de Schweiz deheem. Net de Siebenpfeiffer aus Humborch hat die Demokradie erfunn, sonnern de Zweebricker Vaterlands- un Pressverein im Gaschdhaus Ladeberscher in Buwehause. Un als so weider.

Hinner meim Haus in de Landauer Stroß

Jetzat steht in de Zeidung, die Dingwerder hätte de dickschde un größschde Gödderbaam weit un breit, 4,40 Meder de Umfang, die Höh knapp 25 Meder. Nix do, dass ich net lach: Do leije se schunn widder falsch, die Angewwer vun de Saar. Die kenne sich ihr Bäämche an de Hut stecke!

Wieso ich des weeß? Ei ganz enfach: Weil de dickschde un gröschde Götterbaam in meim Gaade steht, hinner meim Haus in de Landauer Stroß 108. Dort kann jeder nohgucke un staune, ah die Saarlänner: Wie ich denne Artikel in de Rheinpalz geles hab, bin ich glei nunner un hab nohgemess. Des heeßt, weil ich kee so großes Maßband hab, hab ich halt schätze misse. Un ich bin zum Ergebnis komm, dass mei Götterbaam e Umfangg vun 4,85 Meder hat, un guud 26 Meder hoch is, also denne Dingwerder Kolleesch deitlich iwwertrumpft. Ich werr jetzat glei an des Guinessbuch der Rekorde schreibe, demit des amtlich werd.

Großmudder Friedel hat ne 1960 geplanzt

Ich weeß ah ganz genau, wie alt mei Ailantus altissima is (des is kee saarlännischie Mundart, sonnern de botanische Name vum Götterbaam). Mei Großmudder Friedel, die in Sulzbach gebor is (!), hat ne 1960 in unserm Gärdche geplanzt. Es gebt e Foddo, do bin ich mit 18 Johr druff, deneewe mei Muddi un die Oma, un zwische uns steht e derres, armselisches Kerlche, es eenjährisch Götterbäämche. Mei Vadder hat sich geweischert, sich dezu se stelle, weil er vun Anfang an dem Chines net getraut hat. Muss des dann unbedingt e Chinabaam sinn, hat er gemault, duud’s net e Birk odder e deitschie Eich? Die Großmudder hat in de erschde Woche uff de Gummimatratz neewe dem Bäämche geschloof vor lauder Angschd, mei Vadder dääd’s nachts umhaue.

So, un jetzat steht de Rekordbaam in unserm Gaade, do kenne die Dingwerder mache, was se wolle. Na ja, weje meiner Sulzbacher Oma is er jo ah so e halber Saarlänner, genau wie ich.