Nebenbei gereimt Kolumne, äh Bütteredd zum Wochenende – die Redaktion tut liebe Grüße sende
Wie losgeloss
Iwwerall geht’s grad besonnersch närrisch zu; das lässt uns in de Redaktion dann ah kee Ruh
Do juckt’s in die Finger un die Lachmuschkele zucke; schnell die närrisch Kolumne schreiwe un de Kollesche ausdrucke!
Dann werd in de Bahnhofstroß gegiggelt und gelacht; weil mers sonschd so selte macht
Se reime is eigentlich net unser Metier; deswehe läst sich der Text do ah so zäh
Hoffentlich hann ihr Leser e bissje eier Fräd; ansonschde dud’s uns arisch Läd
Schmerzensgeld werre mer eich käns zahle; doch wer bis zum Schluss läst, kann vor de Kumpel prahle
Negschd Woch werd do wirrer ordentlich geschrebb; und net so pälzisch und so schebb.
Versproch!
Autobahn-Baustelle
Alleh, helau, jetzt reim' halt was!
Oh ha, das wird ja wohl kein Spaß
Worüber bloß? Da fällt mir ein, es könnt' ja was mit Freiheit sein
Denn Freiheit, glaub ich, ist zur Stund'
das Wort in jedem großen Mund
Nur leider, leider, wie's mir scheint
ein jeder Mund sich selbst nur meint
Schon fangen die Probleme an:
Denn frei ist nur, wer teilen kann
Was mich mit Stichwort Freifahrtslücke
bringt zur A62-Brücke, wo ziemlich nah bei Glan-Münchweiler; die Freiheit bremsen Fahrbahnteiler
Teils neu ist der Asphalt dort schon
Der Reifen rollt, dann, welcher Hohn
100 und 80 – was für Regeln ... Ich lass die Automatik segeln; und freue mich: null Spritverbrauch! Natürlich weiß die Polizei das auch.
Ein Dreibein hier, ein Blitzer dort – so schnell sind 20 Euro fort.
Das ist mir aber kein Verdruss:
Null Spritverbrauch – ich bin im Plus! Spar'n durch bezahlen ist das Motto
das gilt nicht nur beim Blitzerlotto
Wer segelt, zahlt, doch bleibt's dabei
Ich teil mein Geld, ich bin so frei!
Bärmesenser
Ich konn’s ned verstecke und es fallt halt mo uff: Ja, ich hab e Migrationshinnergrund.
In de schäh Schuhstadt Bärmesens redd ma onnersch als im Kusler Kräs
Do werr ich efters gefroht: Was hatten des gehäß?
Uns Bärmesenser werd gsah, mir gehn zum Lache in de Keller. Mir misse halt ersch warmwerre – monche longsom, monche schneller
Die Kusler do howwe honn schun ihr Humor. Awa dass se lieb gugge, kommt seltener vor
Die Sprich sinn trucke wie de Woi in der Vorderpalz, doch Gott sei Donk laaft do eher Bier runner dorch de Hals
Ich will gar ned liehe, bei de Bärmesenser isses es selwe. Sogar in de Politik – egal ob Griene, Schwarze, Rode oder Gelwe
Nur die Blaue, die brauch ma beide ned. Zumal do braun eh besser gebasst hett
Ich bin kä Fasnachter und werr ah kenner mehr werre, die paar Zeile do warn schwerer, als die meischde Leit menne
Normal misst ichs gonze Helau, Alaaf und alles drummerum vun Klä uff in de Gene honn. Awa nodem moi om Rosemondah in Köln geborni Oma Bärmesenser Faschingsprinzessin war, iss des schoinbar verlor gong
Vielleicht sinn sich die Bärmesenser und Kusler jo ähnlicher, als ma menne, awa e neier Dialekt will ich trotzdem ned lerne
Narr oder Muffel?
Mit de Fassenaacht is es wahrlich wie mit allem im Lewe, die äne siehns schlechte drin, die annere s’scheene
Ja, es gebbt verschiedene Sorte Leit
die sich am beschde beschreibe losse in folgendem Vergleich:
Do is zum äne de Partylöwe, der det zum Feiere werklich töde
Fer jed Saison hat er e anneres Koschdiem, ihm wurd vielleicht aach schun de Goldene Löwe verliehn.
Uff jede Fall is er an Fassenacht net se bremse, alles werd mitgenomm – ohne se schwänze
Dann gebbts uff de anner Seit de Partymuffl(on), der so gar nix anfange kann mit de Faschingssaison. Woch fer Woch freit er sich uff denne Daach, wenn se endlich rum is die Fassenaacht. Koschdieme kommem net ins Haus, wenn er Viva Colonia heert, flippt er aus
Un wenn am Mittwoch bei de Narre Träne fließe, fangt er an, Feierwerk in die Luft zu schieße
egal zu was ner selbsch geheere, ob ner die Löwe odder die Mufflons beehre
Ich winsch eich jetzt e Endspurt mit viel Freid un Radau
Machents gut - Alaaf, Ahoi un Helau!
Besch ... eiden
So, jetzt langt’s mit dem Geschwall
Ich glaab jo fascht, mir hann e Knall
So e Nonsens zu verzabbe
(mir hann noch net mol Narrekabbe)
Geje gewisse (Alp-)Traumdänzer
Wirke mir wie Hilfsschul-Schwänzer
Wann’s um Dummgelaber geht
Hat Määnz die Latt zu hoch geleet
Dort hann vor korzem die Genosse
Die Kuh so richtich flieje losse
Die Ex-Partei fer klääne Leid
(wo schwafelt vun Gerechtichkeit –
genau – der rote Narrehaufe
der wo am liebschde „Woi“ tut saufe
Dem Volk awwer gern abverlangt
Dass es nur noch Wasser tankt) –
Der hat vorm Wahlkampf festgestellt
un rausposaunt in alle Welt:
„Rheinland-Pfalz is’ Paradies
Nur die Schwarze machen’s mies
Kommune strotze all vor Geld
Sinn finanziell gut uffgestellt
Deshalb leit aach uff de Hand
Die brauche gar kää Geld vom Land
Lautre und aach Bermesäns
Die hann genuch, von uns gibt’s käns“
Unn: Sogar im Kusler Land
Hat doch die private Hand
Geld zum Fresse, ohne Sch...
Dafür gebbt’s jetzt aach ’n Beweis
Denne hat vor e paar Daa
E Mann im Kreistag vorgetra
Hat behaupt, es is kä Scherz
Es „Armehaus“ macht grundlos Terz
Dort wohne lauter reiche Leit
Die guggen aach in Krisenzeit
Fußball nur im Pay-TV
(Odder fahrn zum Betze hie)
De Preis fers Abo dud net weh
Die Leit verdiene jo all meh
als wie se je im Läwe braichde
Weshalb se sich viel Luxus leischte
Jeder hat zwar nur zwää Ohre
(un e Nos, fer drin zu bohre)
doch jeder hier im Kuseler Land
hätt drei Smartphones in de Hand
Wer derart strunzt, dem gschieht’s doch recht
Dass er zehnfach Grundsteier blecht
Deshalb zieht Määnz die Drossel zu
Wann alles kabbutt is, is hoffentlich Ruh
Zu Fasnacht schieße mehr serick:
Das is echt e Sch#@&x%-Politik!