Zweibrücken Die Glock kann ich heit noch uffsaan

Anfangs ware mer uns all minanner eenisch, de Paul, de Bruno, unser Wert, un ich. Heitsedaas lerne die Kinner in de Schul nix meh richdisch, hammer gemennt, sie lese bloß noch vum Compuder ab, hann nix im Kopp, sonnern nur noch in de Fingere, die uff de Taschdadur rumhämmere, alles annere besoin de Google un es Wikipedia. Was hann mir frieher in de Schul alles ausewensisch gelernt, mei liewer Schollie! Ganse Ballade vum Schiller un vum Goethe! Die Glock kann ich heit noch vorwärts un rickwärts uffsaan. Alle deitsche Kaiser vum Karl de Große bis zum Beckebauer, die zeh Gebode un de Kadechismus vun vorne bis hinne! De ganse Name vum Hadschi Halef Omar Ben Hadschi Abul Abbas Ibn Hadschi Dawud al Gossarah! Mir ware e wandelndes Lexikon! Ei mir kennde heit noch in jeder Quizsendung Millionäre werre, wann mer bloß wollde! Dann hammer dabber unser Feierowendschöppche gedrunk un ware gans schdolz, was mir alles in unsre Köpp drin hann. Manchmol isses awwer ah e Laschd, dass de der alles so guud merke kannsch un nix vegescht, hat dann de Paul gemennt. Mir geht seit heit Morje des Lied nimmie aus`m Sinn, des „Strangers in the Night“ vun de Beatles. Des will enfach nimmie aus meim Hernkaschde enaus, kannsch nix mache. Un dann hat er`s uns vorgeträllert: „Da dadada, dada da da..“ Heer mer bloß uff, hab ich ne unnerbroch, der Song is erschdens net vun de Beatles, sonnern vum Frank Sinatra, un außerdem is des, wo de do trällersch, de „Griechische Wein“ vum Udo Lindebersch. Do bische jetzat ah err, hat de Bruno gelacht, de „Griechische Wein“ is vum Udo Jürgens, un em Paul sei Melodie do, wo`m nimmie aus`m Kopp geht, des is de „fröhliche Vagabund“ vum Fred Bertelmann, des war mol mei Lieblingsschlacher. Im Lewe net, hat de Paul gescholl, ich kenn doch die Beatles in- un ausewensisch, was wedde mer dann, ihr zwee owwergescheide Dummbeidel. In dem Moment is de Fritz die Dier rin komm, hat sich zu uns an die Thek gehockt un sich e Schöppche beschdellt. N` Owend Fritz, hat de Paul ne begrießt, du kommsch wie geruf. Du singsch doch im Liederkranz un kennsch dich aus. Bass mol uff, was is dann des fer e Melodie? De Fritz hat zugeheert, was de Paul em do vordrällert, hat dann korz iwwerleet un gemennt: Ei jo, kenn ich des, des is doch „Gern hab ich die Fraun gekisst“ aus`m „Beddelstudent“. Alla, hab ich gemennt, losse mer`s guud sinn. Wer weeß dann, wie die Laudrer heit owend velor hann?