Landau Verzich Frooche aus em Lewe

Ou Hildegard, wann ischs en sou weit? Was ischs dann? E Mädel? Alles gsund? Anne hääßt se? Schäi! Wie grouß isse dann? Was wiecht sen? Schlooft se durch? Was, sie kriecht schun Zäh? Do isse awwer beizeit. Krawwelt se schun? Was, gfalle isse? Seit wann laaft se dann? In de Kinnergaarte geht se? Gfallt’s ere? Isch se schun sauwer? Was, sie geht schun ind Schul? Wied Zeit vergeht! Im Gymnasium isse? Wu? Wie macht sen sich? Mittlere Reife hot se? Will se weitermache? Was studiert se dann? Lehrerin isse an de Grundschul? Geht se noch mit em Steffen? Gheirat hän se in de Ferie? Uf de Maledive? Hots eich nix ausgemacht, dass er net debei waren? Im wievielte Monat isse dann? S erschte Enkele, do hän er eier Pläsier. E Biewel ischs? Bleibt se dehääm oder hot se e Daachesmutter? Rektorin isse wore? Sin er stolz, hä? Was hot se dann ghat? Geht’s widder besser? Noochwuchs kriechen se noch emol? Hots werklich geklappt, hän se ehr Päärle? Nimmscht die Klänne als emol zu der, wann ehr Mama Konferenz hot? Wie nimmt en de grouße Bruder die Klää uf? Hot des geklappt mi dem Haisel in de Hinnergass? Hän se kä Angscht ghat, dass se zu viel neihänke missen? Hän se beschtimmt viel rausreiße misse, gel? Wie stellenen sich die Klänne aa im äächene Zimmer? Hän se ebber fer den grouße Gaarte? Schafftschs noch allää oder hoscht e Butzfraa? Bischt widder dehääm? Was hoscht dann ghat? Ischs ganz pletzlich kumme? Muscht dich noch halte? Wie lang dauertsen noch? Kannscht mit negschwoch bei de Seniorefahrt? Gehscht ach widder uf de Altenoochmiddaach? Sähne mer uns? Helfen der dei Junge oder hän se zu dau mit sich selwer? Kummen se widder all zu der an Heilichowend? Wie geht ders dann? Wie kummscht en zurecht, seit dein Guschtav nimmie do isch? Haltscht’s aus allää?