Mundart-Kolumne 
Vielleicht geht bei uns ball widder de Kohleklau um
„Es kommt alles wieder, es is niemals vorbei“, hat mer e Schlacher umgetext, denne die Lale Andersen vor ewische Zeide gesung hat. Dodran hab ich denke misse, wie ich de Aufruf vum Robert Habeck geles hab, mer soll Energie spare. Es is genau achzisch Johr her, dass mer schunn emol so e Sparkampagne beschloss hat. Domols isses wennischer um’s Gas gang wie um die Kohle. „Kampf dem Kohlenklau“ hat die Devise geheeß, mit der e extranie Propagandaabteilung die Leit angehall hat, mit de Brennstoffe sparsam umsegehe. Dezu hat’s e Karrikadur vum schwarze Mann gebb, der e gewissie Ähnlichkeit mi’m Propagandaminischder gehat hat. So wie heit hat ah domols Russland e Roll debei gespielt, weil dort die deitsche Soldade arisch gefror hann.
Nohm Kriesch hann mer all minanner noch meh gefror un geguckt, wie mer zu unserm Winderbrand komme. Jetzat hat de Kohleklau nachts heimlich am Giederbahnhof die Kohle gehamstert. Aller, geklaut is geklaut, awwer mer hat halt e Au zugedrickt, un de Kölner Kardinal Frings hat gemennt, mer breicht’s net se beichde. Desweje hat mer’s Organisiere vun de Kohle bei Nacht un Newwel domols „fringse“ genennt.
Polidischer Kohleklau
Es hat dann in de fuffzischer Johre driwwe im Saargebiet, wie’s noch geheeß hat, e polidischer Kohleklau gebb. Des ware die Franzose, weil se die Saarkohle fer sich selbert abgebaut un fortgeschleppt hann. Die Knappheit domols hat ah ihr gude Seide gehat. De Wald war scheen uffgeräämt, nerjens hat e Ächdche gelee. Mer konnt sich beim Forschdamt e Leseschein besoije un des lose Holz im Wald insammle; es is awwer ah ohne Schein gang, bloß hat mer sich net derfe vewische losse. Mir Kinner hann ah geholf, demit de Owe net ausgeht, un hann Bredder un Balke aus de Ruine angeschleppt.
De Brand fer de Winder hat mei Vadder im Auguschd beschdellt, weil er do e bissje ginschdischer war. E paar Daa dennoh hat de Kohlehännler die Kohle un Brickett vorm Kellerfenschder uff’s Trottoir gekippt, un mei Vadder un ich hann alles nunner in de Keller geschaufelt. Dort hab ich dann die Brickett ordentlich zu em Mäuerche gestabelt un dann ausfgesieh wie de schwarze Kohleklau persönlich.
Energiezendrale in de Kisch fresst alles
Die Energiezendrale in unsrer Wohnung hat in de Kisch gestann un is mit allem gefiedert worr, was gebrennt hat: mit Kohle un Brickett, Anthrazit un Eierbrickett, Holz un Torf, Babier, Säämehl un Grumbeerschale. Des war e eiserner Kicheherd, der alles gekennt hat, net bloß heize, sonnern ah koche, backe, heißes Wasser liwwere, die Wäsch driggele un im Backowe die kalde Fieß wärme. Kennt sinn, dass mer so e Kamerad ball widder brauche, wann uns de Gashahn zugedreht werd. Vun all dem weeß der Habeck nadierlich nix, weil er viel se jung is, der Lauser. Awwer er braucht mich bloß anserufe, un ich saa’m Bescheid.