Kolumne: Do bische platt Mer feiere de hunnerdschde Gebordsdaa vum Radio
Von Wolfgang Ohler
Ich erinner mich in meiner Kolumne gern an Jubilare un runde Gebordsdaa. Desweje will ich dabber, bevor des Johr schunn widder erum is (in finf Woche!) noch e Hunnertjährisches feiere: de Gebordsdaa vum Radio. Das hat in meine Erinnerunge schunn öfder emol e Neeweroll gespielt, zum Beispiel als Kofferradio am Schwimmbad odder mit de Sendunge vum CFN drowwe uff’m Wallerscheid. Heit soll’s awwer im Middelpunkt stehe, es Radio, denn des hat’s werklich vedient.
In meiner Kindheit hat’s in de Kisch sei Platz gehat un war newem Owe es allerwischdischde Möbel. So wie de Herd fers leibliche Wohl gesoit un uns satt gemacht hat, so hat de Radiokaschde die Ohre gefiddert.
E Häkeldecksche un e Rehkitz aus Porzellan
Unser erschdes Radio war e Saba aus braunem Holz, die Vorderseit mit em grienbraunbrenzliche Stoff bespannt. Es hat in de Eck uff’m Schuhschaft gestann, owwedruff e gehäkeltes Decksche, dodruff e Rehkitz aus Porzellan. An de Feierdaa hat’s mit eniwwer in die guud Wohnstubb gederft, samt Deckche un Reh. Es war mei liebschdes Spielzeich. Wann ich am rechte Knopp gedreht hab, dann is der Balke uff de Skala von eem Sender zum nächsde gewannert. Es hat se’erschd gepiff, dann gerauscht, dann hat mer die Mussik gehört odder e Stimm. Un wann ich net uffgebasst hab, war ich im Nu driwwer enaus, un es hat widder gerauscht, gepiff un geknaddert, als dääd sich do drin e Wolkebruch ausdoobe. Ich hab mer als e Spaß draus gemacht, de Knopp so schnell se drehe, dass der Balke iwwer die Skala gewetzt is un mer nur e schrilles Gequietsche un Plärrgeduudel gehört hat.
Meiner Muddie ihr Sender war Radio Saarbrigge. Des is mei Heimat, hat se gesaat un dief geseifzt, des brauch ich fer die Seel. Ihr Lieblingssendung war die Familie Weissebach. Wanns geje Midda gang is, dann hat se beim Kartoffelschäle un Bohneschnibbele es Gerdie un de Fritz Weissebach gehört, Daa fer Daa. Mahlzeit! Wann als de Heinz Maria Linz des Lied vum Soldat am Wolgastrand gesung hat, hammer allegaar still sinn misse, un mei Vadder hat e ganz kleenes Gesicht un feichde Aue kriet. Jetzt hockt er in Gedanke widder im Schitzegrabe in Russland, hat mei Muddie geposchbert.
Unnerwegs im Audo
E paar Johr später bin ich owends in de Kischeeck uff Entdeckungsrees durch die ganz Welt gang. Un eenes Daas die Sensation: Mir hann in unsrer Stadt e eischener Sender, drowwe uff de Air Base, de CFN, un der hat ball de Rock’n’Roll entdeckt.
Un heit? Ich will ehrlich sinn, ich hör Rado bloß noch unnerwegs im Audo. Dann oft SR 3, des war frieher die Saarlandwell, de Lieblingssender vun meiner Muddie. Ich muss dann bloß uffbasse, dass ich während de Fahrt net inschlof.