Mundart-Kloummne Do bische platt: Warum frieher de Mai viel schenner war

Alles nei macht de Mai, heeßt’s im Sprichwort. Dodemit is die Nadur gemeent: Iwwerall sprießt’s un blieht’s, die ganz Welt werd grien un bunt. Des funktioniert ah heitsedaas noch, uff annere Neiischkeete kannsche lang waade.

Frieher, do hat zum Mai de Maikäwwer gehört un die Schließ. Pinktlich am 1. odder 2. Mai is de erschde Maibrumser gefloo komm, un am selbe Daa hat de Bademeeschder Messerle sei Freibad uffgeschloss un des bei jedem Wedder. Mit uns Buuwe hat er reschne kenne. Finf Minudde denoh sinn mir angewetzt komm, egal ob die Sunn geschien odder ob’s geschneit hat. Des Wasser vum Schwarzbach, domols noch unser Freibad, war sowieso so arschkald, dass es der die Badehos ausgezoo hat.

Maikäwwer hat’s domols noch jedie Meng gebb, hasch bloß owends es Kischefenschder uffmache misse, schunn sinn se angeschwirrt komm, geje die Kischelamp gebumst, uff de Disch abgesterzt un sofort ins Zigarkäschdche gewannert. Des Käschdche hammer schunn Daache vorher vorbereit gehat, Luftlöcher enin gebohrt un mit Bucheblädder ausstaffiert, demit’s die Käwwercher gemiedlich hann.

Heit stehn se uff de schwarze Lichd vum Nadurschutz, so selden sinn se worr, un die Kinner halle sich liewer e Goldhamschder. Dodefor schwirre jetzat in de Allee die Maikrähe, die kammer awwer net in e Zigarkäschdche insperre.

Domols hat’s im Friehling noch meh Neijes gebb: De Mai war de Gliggermonat. Vum erschde Sunndaasgeld hab ich mer beim Schulitz e Säckche Lehmcher kaaf, des ware die billische Glicker, die mer beim Gliggere uff de Stroß riskiert hat. Mit de deire aus Achat un fabischem Glas hat mer bloß angebb, awwer net gespielt.

Unser Spiel hat so funktioniert: Mi’m Schuhabsatz e Kuhl in de Boddem gebohrt un dann aus e paar Meder Entfernung vesucht, die Gligger enin se schnipse. Die Gligger, die’s net geschafft hann, hat mer dann mi’m Daume enin geschubbst. Wer de Ledschde vesenkt hat, dem hat alles geheert. Die Mäde hann derweil mit Kreid e Hickelhaisje uff die Stroß gemolt un sinn dort gehupst.

Jetzat hätt ich beinächschd die Mauerseeschler vegess. Die sinn ah pinktlich Anfang Mai aus Afrika serick komm in ihr alde Neschder unnerm Dachkannel. Een, zwee Daa hann se sich ausgeruht, dann sinn se de ganze Daa lang iwwer de blooe Himmel gefeescht un hann gekrisch, was es Zeich halt.

Wann ich owens im Bett gelee hab, hab ich heemlich die Fenschderläde uffgeklappt un dorch de Spalt die Mauerseeschler vorbeiflitze gesiehn un rufe gehört. Ball simmer die Aue zugefall, un wie ich se korz druff widder uffmach, war’s de nächschde Morje. Des misst mer heit noch bassiere!