Zweibrücken De Tom Mix hat bloß Hochdeitsch gekennt

Was heit fer die Juchend alles gemacht werd, mei lieber Schollie! Alleen do in dere Zeidung. Do gebt`s Kinnernachrichde, demit die klenne Leser uff`m Laufende sinn. Nils Nager erklärt, was in de Welt bassiert, wie alles funktioniert un was es bedeit, was mer do so an gescheide Sache lest. Er hat ah sei eischener Club, de Nils, un sei Clubzeidung, mer find ne im Internet, weil des derf jo heit net fehle, un wer mitmacht, kriet e Clubausweis. Der klenne Biber is eewe e schlaues Kerlche un weeß, wie mer die Kinnercher schunn frieh fer die Zeidung indressiert. Wie ich so e Buu vun Sticker acht, neun Johr war, hab ich angefang, die Zeidung se lese. Se`erschd hat mich awwer bloß de „Pälzer Feierowend“ indressiert, weil dort Geschichdcher in Mundart gestann hann, vum Otto Wilms un de Liesel Ott. Am Samschdaamorje beim Friehstick hat mei Vadder mer die Beilaach iwwer de Disch geschob, un sie hat e paar Marmeldeflecke abkriet. Wahrscheinlich war de „Pälzer Feierowend“ bei mir schunn de Anfang fer de Spaß mit de Muddersproch, so wie ich se deheem in de Kisch un drauße uff de Gass gelernt hab. An`s Feierowendschöppche hab ich allerdings noch net gedenkt, Ehreword! In de Schul hat jeder die „Jugend am Rhein“ abonniert, die unser Frollein Wolf jede Monat ausgedeelt hat. Na alla, e Nils Nager hat`s in dem Heftche net gebb, dodefor Gedichte vum Hermann Löns un Ludwich Uhland, fer die sich kenner vun uns Lauser begeischdert hat, Bilder vum Ludwich Richter, Schereschnidde vun de Hedwich Beilhack-Frick, die bei uns in Zweebricke Lehrerin gewest is, fromme Sprichelcher, e Bericht iwwer de Albert Schweitzer, alles arisch langweilisch. Nur enns hat uns werklich indressiert: die Fortsetzung vun „Onkel Toms Hütte“, die sich iwwer e ganses Johr dorch die Heftcher gezoo hat, do is doch wennischdens ab un zu emol was bassiert. Im Unnerschied zum „Pälzer Feierowend“ war alles sauber in Hochdeitsch geschribb, weil uns des die Schul beibringe sollt. Des Deitsch vum Herr Duden war sosesaan unser erschde Fremdsprach. Des ganse Heft war eischendlich bei uns dohinne am Schwarzbach fehl am Platz, weil`s jo, wie de Name veroot hat, fer die Juchend vorne am Rhein geschribb war. Mir hann desweje die Schundheftcher vorgezoo, die`s fer e paar Grosche beim Nutze Schorsch in de Maxstrooß se kaafe gebb hat. Alla, die ware ah all uff Hochdeitsch geschribb, abber des hat mer beim Tom Mix, Billy Jenkins un Tarzan in Kauf genomm. Do hat mer ah e Haufe gelernt, was de Albert Schweitzer net gewisst hat un fer`s Lewe wichidisch is: Wie mer mit Indianer kämpft, es Lasso schwingt un die Friedenspeif am Laacherfeier raacht.