Ich mään jo blooß The return of the Butzwoch
Sie kennen des, wann die Kafruse ebbes mit de Finger uff die Heckscheib vun ihrm Auto schreiwen? Des geht im Winter b’sunnersch gut weche’m Wetter un em Matsch un ... – Was soll des hääße, Ihr Auto isch im Winter nit dreckich? Wie soll dann des funktioniere? Fahren Sie blooß in Ihre Doppelgaraasch hie un her odder was? Was sinn dann Sie fer en Vochel?
„Saachemol“, froocht mich mein Kumbel Fred un lecht mir e Hand uff de Arm, „dischbedierscht du grad mit deine paar Leser?“
„Die Dannde Liesel isch die Woch bei ihre Großcousine im Saarland“, saach ich.
„Un des lossscht du an de Leit aus?“
„Du hoscht jo recht“, saach ich. Awwer mir geht halt es Wetter uff de Zeicher. Un dass ich im Moment seelisch un moralisch verpflicht’t bin, in jede freie Minutt Olympia zu gugge, macht’s ach nit besser. Ich saach blooß: Körling un Shortträck.
Es war jo ach blooß en Aaknipfungspunkt, des mit de Heckscheib. Ich bin druff kumme, weil ich grad in meim Birro aus’m Fenschter guck. Un uff dem Fenschter steht, sauwer vun auße middem Finger g’schriwwe, „BUTZWOCH“. Mei Mitbewohnerin muss sich e Lääterle genumme hawwe. Ich hugg im Erdg’schoß mit Kniestock, missen Se wisse. Un ich deet gern schreiwe, bin awwer jetzt im Stress weche dem, was nooch’m Feierwoowend droht.
„Hoscht du nooch Feieroowend schunn äämol en Handsträäch in eierm Haushalt gemacht?“, frooch mich de Fred.
„Es geht ums Brinzibb“, saach ich.
Ich schbier, wie sich von hinner mir e Hand viel zu sanft uff mei Schulter lecht. Es isch nit die vum Fred. Un die Dannde Liesel isch nit sanft un im Saarland un mer deed schunn vun drei Meter de Konnj...
„Du määnscht des Brinzibb, dass mer vun November bis April nit die Fenschter butze kann, weil’s Wetter zu schlecht isch? Un vun Mai bis Oktoower geht’s ach nit, weil mer die ganz Woch demit zu duu hot, sich vorm Rasemeehe zu dricke?“
Im Brinzibb mään ich genau des. Plus: E Butzwoch isch ach widder neggschtjohr. Gleich fahrt nämlich die Emma Aicher. Ich mään jo blooß.
Der Autor
Michael Konrad ist bei der RHEINPFALZ am SONNTAG der Mann für die Pfalz und alles Pfälzische. Mit seiner wöchentlichen Dialektkolumne „Ich mään jo blooß“ und der Mitmachserie „Saach blooß“ über Pfälzer Begriffe und Redensarten schafft er Raum für die Sprache der Pfälzerinnen und Pfälzer. Die Leser können ihn damit immer wieder auch „live“ erleben – überall in der Pfalz. Seine Bücher rund um den Pfälzer Dialekt gibt’s unter anderem in Pfalzläden, im Buchhandel und im RHEINPFALZ-Shop.