Ich mään jo blooß 
Schwääßnass uffgewacht
Gedräämt hawwich, dass die Dannde Liesel middem Bus in die Stadt fahrt, e Blaggaad unnerm Arm, wu ich erscht nit lese kann, was druffsteht. Dann stellt se sich uff de Marktplatz un hebt ihr Babbedeggelschild in die Luft. „Streisalz isch e Menscherecht“ steht druff. Es isch, wie’s aussieht, samschdaachs, ich bin nämlich grad uff’m Wochemarkt. Un ich merk: Do isch en Tumult. Ich schieb mich durch die Traub vun Mensche, wu um die Dannde Liesel rumsteht. Ich kletter uff e Weikischt aus Holz, wu’s eichentlich gar nimmi gebt, weil die Branche es Pandsischdeem schunn vor Johre uffgewwe hot. Ich guck an mir runner; ich habb mei Subbermän-Koschdiem aa! Ich hol dief Luft un blärr iwwer de Marktplatz, dass es ach jeder heert: „Känn Mensch braucht Streisalz, weil mer fer’s Trottwar genauso gut Splitt nemme kann. Ja, Splitt!“ Gemurmel. „Den Splitt kehrt mer hinnenooch z’samme un hebt en uff fer’s neggschde Mol. Un ferdich isch de Lack!“ Buhrufe. „Salz isch schlecht fer die Naddur!“, blärr ich.
„Salz isch schlecht fer unsern Kater! Schlecht fer’s Grundwasser! Schlecht fer de Unnerboddeschutz vun meim Klääwache aus de Nullerjohre!“ Er paar Leit peifen, enner blärrt „Dummbabbler!“ Sehen die mei Subbermän-Koschdiem nit? „Splitt isch die Leesung!“, blärr ich. „Was isch e bissel Kehre un Bicke fer sauweri, g’sundi Welt ohne Salz!“ In dem Moment nemmt die Dannde Liesel ihr Blaggaad runner. Es werd gejohlt un geklatscht. Änner blärrt: „Zeich’s dem Kaschber!“ Die Weikischt knarzt.
Do werr ich wach, schwääßnass, mir stehen alle Hoor. Es klingelt an de Dier. Um die Uhrzeit? Was soll dann des? Ou – des war mein Middaachsschloof.
An de Hausdier steht die Dannde Liesel.
„Du muscht mit deim Scheff redde, sofort“, saacht se. „Mit dem vun de Zeidung.“ Sie bohrt mir de Zeichefinger in die Bruscht. Ich such nooch’m Blaggaad, awwer do isch känns. Uff. Naddierlich nit. Ach känn Schnee weit un bräät. Vielleicht hawwich jo Glick.
„Es werd Zeit fer en Film iwwer mich“, saacht se un fahrt sich iwwer de Kittelschorz. Mei Kinnlaad knackt. Ich guck se aa.
„Wann de anner in Ameeriga en Film mache kann iwwer em Babbsack Seini, danne kinnen ihr dreimol en Film mache iwwer ...“
Noch emol wach werre, bitte! Bitte! Bittebitte!!
Ich mään jo blooß.
Zur vorherigen Kolumne geht’s hier: Mehrwertsteiersenkung fer die Gaschtronomie – war do ebbes?
Der Autor
Michael Konrad ist bei der RHEINPFALZ am SONNTAG der Mann für die Pfalz und alles Pfälzische. Mit seiner wöchentlichen Dialektkolumne „Ich mään jo blooß“ und der Mitmachserie „Saach blooß“ über Pfälzer Begriffe und Redensarten schafft er Raum für die Sprache der Pfälzerinnen und Pfälzer. Die Leser können ihn damit immer wieder auch „live“ erleben – überall in der Pfalz. Seine Bücher rund um den Pfälzer Dialekt gibt’s unter anderem in Pfalzläden, im Buchhandel und im RHEINPFALZ-Shop.