Ich mään jo blooß 
Mehrwertsteiersenkung fer die Gaschtronomie – war do ebbes?
Mir schreiwen es Johr 2026, un mer griecht als Gascht im Lokal absolut nix devu mit, dass de Staat aafangs vum Johr die Mehrwertsteier fer Mampfes im Lokal von 19 uff 7 Prozent g’senkt hot. Dass also vun emme Rumpsteak fer 25 Euro nimmi 4 Euro als Mehrwertsteier direkt ans Finanzamt gehen, sondern blooß noch 1 Euro 64. Odder vun emme Doppel Whopper fer 8,49 Euro nimmi 1,36 Euro, sondern 56 Cent.
Jetzt kammer dischbediere, dass es ohne die Mehrwertsteiersenkung ball gar kä Lokale mä gewwe deed im Land, weil in Deitschland jo alles so deier worre isch weche’m Russ un weche’m Ami un weche de Bolledigg im Allgemeine un weche’m Mindes chtlohn im B’sunnere. Mer derf als reechelmääßicher Gascht awwer ach degechehalte, dass alles, iwwer was do – meinetweeche zu recht – seit Johr un Daach gebebbert werd, sich genauso seit Johr un Daach knallhart in de g’salzene un gepefferte Preise widerspichelt. Also im Preis fer e Rumpsteak odder fer en Whopper – odder fer en Salat ohne alles fer acht Euro fuffzich.
Emol e paar Fakte. Die Mehrwertsteiersenkung isch e Seechnung vum Staat fer die Gas chtronomie, betriwwe vun de CSU un ausg’fiehrt vum SPD-Finanzminischter Klingbeil als Dääl vun de mittelgroße Koalition in Berlin. Fakt 2: Jetzt, wu se iwwer die Gaschtronomie kumme isch, die Seechnung, heert un sieht mer als Gascht devu nix. Dodebei war’s annerscht gemäänt. Owwacht, Fakt 3: De Klingbeil hot letzschtjohr verzehlt, er werd arich uffbasse, dass die Mehrwertsteiersenkung ach beim Rumpsteakfreund un de Pizzafreundin aakummt. Peifedeckel. Fakt 4: Dort, wu ich diesjohr schunn esse war, hot er definitiv noch nit uffgebasst, unser Finanzminischter.
Un wu mer’s grad devu hänn: Wie wär’s dann velleicht emol mit so ennre großziechiche steierliche Seechnung fer die viele Aag’stellte un Arweiter im Land? Wann schunn, dann schunn, odder?
Ich mään jo blooß.
Die Kolumne der vergangenen Woche finden Sie hier: Mein Kumbel Fred, en Kuli un de Antichrischt.
Der Autor
Michael Konrad ist bei der RHEINPFALZ am SONNTAG der Mann für die Pfalz und alles Pfälzische. Mit seiner wöchentlichen Dialektkolumne „Ich mään jo blooß“ und der Mitmachserie „Saach blooß“ über Pfälzer Begriffe und Redensarten schafft er Raum für die Sprache der Pfälzerinnen und Pfälzer. Die Leser können ihn damit immer wieder auch „live“ erleben – überall in der Pfalz. Seine Bücher rund um den Pfälzer Dialekt gibt’s unter anderem in Pfalzläden, im Buchhandel und im RHEINPFALZ-Shop.