Ich mään jo blooß Die Mitbewohnerin un die Trennungsspitze

Nix geht iwwer e g’scheiti Urlaubsplanung.

„Hoscht du gewisst, dass es Trennungsspitze gebt?“ Mei Mitbewohnerin brecht e Eckel vun ihrm Friehstickshernel ab un guckt dann versunne aus’m Fenschter.

„Trennungsspitze?“, frooch ich.

„Zwää Stick: um Weihnachte rum un nooch de Summerferie“, saacht mei Mitbewohnerin. Es Eckel vum Friehtstickshernel wannert in ihrn Mund. Sie kaut bedächtich.

„Du määnscht ...?“

Sie kaut noch langsamer. Dann nickt se.

„Paare trennen sich vor allem nooch Weihnachte odder nooch’m Urlaub im Summer. Do huggen se länger uffenanner wie sunnscht. Also gebt’s do ach die Spitze.“

„Aha“, saach ich. „Un warum genau verzehlscht du mir des?“

„Des hawwich gelese“, saacht mei Mitbewohnerin. Sie brecht ihrm Croissant es Kreiz un lecht dann e Hälft neewer die Tass middem ayurvedische Wohlfiehltee.

„Gelese“, saach ich un muss schlucke. „B’stimmt geschdern beim Friseer, gell?“ Ihr Termine stehn in meim Kalenner, dann denk ich draa, wenn se häämkummt. Ich hab ach e Lischt mit Kommentare, rollierend im Achtmonatsrhythmus; es soll jo nit nooch Routine klinge. Geschdern war „Wow, super!“ draa. Un wie se mich trotzdem skeptisch aageguckt hot, hawwich e improvisiertes „Die Läng isch perfekt“ hinnerherg’schoowe. Ich kann mei Sach. Odder doch nit?

„Ach, des isch e ganzi Weil her“, saacht sie. Ich muss iwwerleche. Sie määnt, seit sie des gelese hot. Sie driggt middem Zeichefinger uffs halwe Friehstickshernel, wie um zu teschte: Lebt des Ding noch?

„Des hoscht du vor enre ganze Weil gelese?“, frooch ich. „Un du verzehlscht mir des jetzt, zwää Woche, bevor mir in Urlaub fahren?“

„M-hm“, saacht se un nemmt en Schluck Tee aus ihre Wonderwoman-Tass. Dann grinst se mich aa. „Es soll jo schließlich widder en Spitze-Urlaub werre, gell, Schatz?“ Sie beißt in ihr halwes Croissant.

Muss ehrlich saache: Uff ihr perfekti Vorbereitung loss ich nix kumme.

Ich mään jo blooß.

Hier finden Sie die Kolumen aus früheren Ausgaben.

Der Autor

Michael Konrad ist bei der RHEINPFALZ am SONNTAG der Mann für die Pfalz und alles Pfälzische. Mit seiner wöchentlichen Dialektkolumne „Ich mään jo blooß“ und der Mitmachserie „Saach blooß“ über Pfälzer Begriffe und Redensarten schafft er Raum für die Sprache der Pfälzerinnen und Pfälzer. Die Leser können ihn damit immer wieder auch „live“ erleben – überall in der Pfalz. Seine Bücher rund um den Pfälzer Dialekt gibt’s unter anderem in Pfalzläden, im Buchhandel und im RHEINPFALZ-Shop.