Ich mään jo blooss Badedaach
„Frieher hämmer alle drei Woche samschdaachmorchens gebad’t“, saacht die Dannde Liesel un wedelt mit ihrm Konnjaggschobbeglas.
Vor meim innere Aach zieht e Bild uff, wu ich seit zich Johr am Verdränge bin, ohne Erfolsch, wie ich zugewwe muss.
„Kalt Wasser in die Wann, dann zwää Kanne hääßes Wasser druff, im schlimme Winter ach emol drei. Erscht isch de Unkel nei un widder raus, dann ich, un dann hämmer dich Freckling neig’huggt, wann du do warscht“, verzehlt die Dannde Liesel, als deed se Urlaubsbilder mit glickliche Kieh aus’m Allgäu zeiche.
„Un die Badwann war schunn Luxus!“, saacht die Dannde Liesel. „Vorher simmer im Hof g’huggt. In de Brenk!“
Vor meine Zeit. Wenigschdens ebbes.
„Un hinnenooch ware mer sauwer!“, saacht die Dannde Liesel. Sie fahrt mit ihre freie Hand iwwer de Kiddelschorz, als deed se so aus de Lamäng jeden Dreck wegwische kinne. Sie saacht nit: „Des waren noch Zeite, sellemols, nit wie heit mit eich Pienser.“ Sie grinst ääfach, als hett se de Stää vun de Weise im Kiddelschorz stecke un in de anner Dasch em Columbus sei Ei.
Naddierliech wääß ich noch genau, wie des Wasser ausg’sehne hot sellemols, am Badedaach samschdaachmorchens. Un wie’s geroche hot, wann sich des bissel Schaum vum Aafang uffgeleest hot un ...
„Un unsern Plumpsklo hämmer g’hatt“, saacht die Dannde Liesel.
Mir grawwelt die neggscht Erinn’rung de Buckel nuff. De Wääch iwwer de Hof, ach nachts un im Winter. Der Abgrund, wu sich vor mir uffgeduu hot, wann ...
„Kä uuneedich Wasser de Klo nabb g’schitt“, saacht die Dannde Liesel. „Do isch ämol im Monat de Puhlmann kumme un ...“
„Dannde Liesel, die Kanalisation isch schunn e Stickel Zivilisation, wu ich ...“
„Un es Beschde war: Klobabbier hämmer känns gebraucht. Mir hänn ääfach die Zeidung in Strääfe g’schnitte. Un jetzt, wu ich’s saach: Des isch doch heit noch e optimali Verwendung fer dei G’schreib...“
Ich hett’s kumme sehe misse.
Nix fer ugut, gell? Es sinn halt annere Zeite. Ich mään jo blooß.