Zweibrücken Was mer aus de Schdadisdike alles rauslese kann

Ich free mich jo jedes Mol, wann mich jemand in de Fußgängerzon, beim Aldi an de Kass oder im Wardezimmer beim Dokder anredd un saat, dass`m mei Geschichdelcher do in de Zeidung gefalle dääde. Neilich allerdings hab ich mei blooes Wunnder erlebt un ordentlich de Kopp gewäsch kriet. Es war e junges, floddes Frääche, des mich gans streng angeguckt hat. Wissen Se was, hat se gemennt, in Ihre Glosse geht`s faschd immer nur um eich Mannsleit un eier Problemcher, um nix Anneres. Die gans Matschoschreiberei iwwer die Feierowendschöppcher in eirer Schdammkneip, die is sowas vun doof un frauefeindlich. Wenne intressiert dann schunn, was de Paul mol grad widder Bleedes vun sich gebt, un wie de Bruno es Bier zappt! Schreibe Se doch mol e bissje meh iwwers Mona un iwwer uns Fraue! Ei des hat mer se denke gebb. Es schdimmt, sie komme se korz, unser Fraue, un des net bloß bei mir do in meiner Kolumne! Grad eewe hab ich in de Zeidung geles, dass die Fraue in de große Unnernehme unnerrepräsentiert sinn: 95 Prozent in de Aufsichtsrät sinn Männer. Desentweje soll jetzat per Gesetz dort e Frauequot vun 40 Prozent ingefiehrt werre. Des wär jo ah fer mich die Lösung: Ich schreib ab heit in meine Geschichde 40 Prozent iwwer`s Mona un bloß noch 60 Prozent iwwer de Paul, de Bruno un unser Feierowendschöppcher, domit wär dann sicher ah des Frääche sefriede, des mich so vescholl hat. Awwer es kommt noch schlimmer: Fraue wäre sowieso die wertvollere Mensche, hat in dem Ardikel geschdann, des kennt mer dodran siehn, dass 90 Prozent vun de Strofgefangene Kerle wäre. Un so geht`s als weider: 70 Prozent vun de Obdachlose un 80 Prozent vun de Drogeabhängische sinn männlich, 65 Prozent lernbehinnerde Schieler sinn Buuwe! Ei do kriet mer jo als Mann e rischdich schlechdes Gewisse un Minnerwerdischkeitskomplexe. Was hab ich dem arm Mona die gans Zeid fer e Unrecht geduun! Dann hab ich awwer iwwerleet: Kann des iwwerhaupt sinn? Wer bleibt dann bei denne hohe Prozentzahle vun uns Männer noch iwwrisch, der net im Kidche hockt, net obdachlos, drogeabhängisch un lernbehinnert is? Vielleicht am Enn bloß noch de Paul, de Bruno un ich? Un missde bei dere Iwwerzahl unner denne 95 Prozent männliche Aufsichtsrät dann net e ganser Haufe Kriminelle un lernbehinnerde Drogeabhängische sinn? Wie reimt sich dann des alles zamme? Also irschend ebbes schdimmt doch do net. Sinn all die Schdadisdike am Enn vun Fraue gemacht, um uns Mannsleit in de Senkel se schdelle, so wie`s des beleidischt Fräuleinche mit mir gemacht hat? Ei der Sach muss ich unbedingt nohgehe. Am beschde ich froo mol glei es Mona.