Zweibrücken Rechtschreiberei mit Kevin, Ben un Sarah

Ich hab mer`s jo eischentlich denke kenne, dass des net funktioniert. Schunn im Februar hab ich eich vun dere neje Method vezählt, de Kinnercher in de Schul es Schreibe beisebreinge. „Lesen durch Schreiben“ heeßt des Programm, noh dem die Schüler glei noh Gehör ganze Wörder schreibe solle, ohne dass es nohm Herr Duden geht. Mit annere Worde: Die Reschtschreiberei spielt kee Roll, Hauptsach mer kann die Wörder dennoh ausspreche. De Lehrer soll die Fehler um Goddes Wille gaanet erschd korrischiere, weil des die brave Kinnercher demotiviere dääd. Also jeder soll noh Luschd un Laune drufflos schreibe, egal wie. Jetzat hat e Kommission e Guudachde vorgeleet, des nohweist, dass die Druff-un-dewedder-Method doch nix bringt un so schädlich wär wie des Glyphosat im Gaade un uff`m Acker. Awwer es kommt noch besser: Mer soll lieber widder zu de aldbewährt Schreibfibel zurückkehre! Ei des scheene Geld fer des Guudachde hätte se sich spare kenne, die gescheide Herre, wann se enfach uff mich gehört hätte. Odder uff mei Großmudder Gretche, die schunn immer gewisst hat: Aller nejer Mode daucht nix. Die „klassische Fibelmethode“ nenne se jetzat, was se uns domols in de Volksschul beigebrung hann, wie mer noch mi`m Griffel uff die Schieferdafel gekritzelt hat. Die soll de Schüler es richdische Schreibe beibringe. Un ich bin emol gespannt, ob net ah ball widder unser Schulfibel „Meine bunte Welt“ in Mode kommt – mit de Geschichdelcher vum Hans, Heiner un de Elsa. Die drei hann uns domols die Welt erklärt un gezeit, wie mer „da ist die Tafel“ schreibt odder „die Schule ist aus“ un „wo ist das Brot“. Nadierlich dääde die drei heit gans annerschder heeße, vielleicht Kevin, Ben un Sarah, un ihr erschde Sätz dääde laude „da ist das Smartphone“ un „wo ist die E-Mail“. Awwer Hauptsach es werd widder korrekt geschribb un net so e Dorchenanner-Deitsch. Manchmol kommt`s mer so vor, als wär vor allem die Schul e großes Experimendierfeld, wo mer sich immer mol widder was Nejes infalle losse misst un jeden Bleedsinn ausprobiere kennt. Un des misse die arme Kinner, awwer ah die Lehrer dann ausbade. So hat mer jetzat endlich gemerkt, dass die G8-Reform, die em Gymnasium die neunde Klass geklaut hat, e Unsinn gewest is. Dabber werd jetzat faschd iwwerall die alde Anzahl vun neun Klasse widder ingefiehrt. Ei uns hat selbsch des frieher als net gelangt un de een un de anner hat dabber e Klass widderholt, um noch e Jährche länger uff de Schul bleibe se derfe; so guud hat`s em dort gefall. Wann ich mich recht erinner, hann zu meiner Zeit de Hans, de Heiner un die Elsa ah zu denne eifrische Sitzebleiber gehört.