Landau Kehraus

Aach Leit, isch des e verdrehtie Zeit! De Schambel Velde hot gebaut un will en Lade vermiete, awwer wer en kennt, der wääß: Er will blouß de Mieter verlade. Sei Biewel, de Kevin-Marius, isch noch net ganz volljährich, awwer schun ganzjährich voll un sei Fraa macht uf vürnaim: Sie schneid kinschtlerisch wertvolle Schatteriss un sieht net de Keller voll mit Ratteschiss. Zu seine Aagstellte isch er iwwerhaupt net nett. De Friedel hot er immer gfroocht, ob em die Stell gfallt, in Werklichkäät hot erm ganz häämtickisch e Fall gstellt. Er war iwwrichens schun emol verheirat, do hot er sechs Kinner un verzehlt ganz stolz, die schreiwen sich all mit Sch: de Schorsch, de Schagobb, de Schoseff un de Schaa. Blouß d’Soffie un d’Sannche schreiwen sich mit Zet. Die erscht Fraa, die Mutter vun de Kinner mit Sch un Zet, isch gschtorwe. Wie er letscht am Grab war un uf em Stää des R. I. P. gelese hot, hot er de Kopp gschittelt: E Ripp war se jo, awwer uf de Grabschtää hetten ses ere trotzdem net zu schreiwe brauche. E klännie Schreinerei hot er, de Velde. Wie se dreimol abgebrennt war un dann mit Hilf vun de Versicherung immer e bissel schäiner widder ufgebaut, hot er se seim beschte Freund gezeicht un stolz gfroocht: Unn? Och, hot der gelacht, ich denk, jetzt kannscht se losse. Mit de neie Fraa, de Kinschtlerin un Mutter vum Kevin-Marius, versteht er sich iwwerhaupt net. De Lehrling hot letscht e deieres Furnier verschnitte. De Velde ziecht en Schlappe aus un schmeißt, de Lehrling duckt sich, hinne geht die Deer uf, die Kinschtlerin kummt rei, de Schlappe trifft se mitte ins Gsicht un de Velde murmelt: Alla, ach gut! Den neie Lehrling, wu sou gschickt dem Schlappe ausgewiche isch, hot er iwwrichens schun eigewisse: Bu, negscht Woch machen mer bankrott, dassd des aa lernscht. Mit seine Kinschtlerin isch er ganz schää neigfalle, sie isch sich fer alles zu schad. Letscht hot er gscholte, weil alles sou staawich war im Haus. Do hot die Kinschtlerin gemäänt, sie macht kän Staab mäh weg, seit se wääß, dass de Mensch aus Staab isch un widder zu Staab werd. Vielleicht isch des unner meim Bett jo mein Lieblingsunkel Philp, hot se sich gewehrt. Denken se draa: Meechlicherweis isch ach heit des Aschekreiz de Cäcar, de Barbarossa oder die Sissi.