Landau Hinnerlosseschaft

S Johr sechzeh isch rum. Wennigschens en schäine Name hots ghat, schäiner wie siebzeh. Ansunschte hots halt gebroocht, was e Johr sou bringt an Schäinem un wenicher Schäinem, an Wohltate un Wehwehle, un es hot uns e Wort des Jahres hinnerlosse, wu mer immer noch uf de Geischt geht. Ich kapier net, wie e Gesellschaft für deutsche Sprache des Wort hot auswähle kinne: postfaktisch. Als Uuwort oder Juchendwort kinnt ichs vun mer aus durchgäi losse, awwer net als en seriöse Begriff in ännere reiche Tradition. Post hääßt nach. Nach den Fakten, des hääßt doch, mer entscheid net blind druf lous, sondern iwwerlecht sich erscht die Fakte un dodenooch trifft mer sei Urdääl. Sou hett des Wort en treffende Sinn. Awwer postfaktisch määnt genau s Gechedääl, es määnt: urteile nooch Gfiehl statt nooch Fakte. Wanns halt dodefor kä Wort gibt, dann gibt’s halt känns, es gibt jo ach kä Wort fer de Dorscht sou wie „satt“ fer de Hunger (vielleicht, weil en Pälzer immer Dorscht hot). Awwer es werd Methode in de Politik, Wörter falsch aazuwenne. Denken se an „nachhaltig“. Wannd frieher e Ohrfeich kriecht hoscht, dass se der gedenkt, dann hot die e noochhaltichie Wirkung ghat. Prowieren se die Formulierung fer unser Politik. Mer muss sich arch verbieche, bis mit dem Wort „noochhaltich“ des rauskummt, was die Politik määnt. Schonend oder ricksichtsvoll oder sparsam, des alles det viel besser basse fer die Art, wie mer mit unserm Globus umgäi sollt. Ähnlich ischs mit „populistisch“. Kaum änner gebraucht des Wort im echte Sinn un oft werds blouß benitzt, fer annere ännie hiezutrete. Wanns schun e Gsellschaft fer deitschie Sprooch gibt, dann sollt se ach des mache, was se uns klänne Lehrerle fer jedie Schulstunn beigebroocht hän: Treffende Worte verwenne, Begriffe, wu bassen, wu Form un Inhalt iwwereistimmen. Was entwickelt sich do, wammer jedem Wort erscht en Beipackzettel mitliffere muss, e Schild draahänke, was demit gemäänt isch un was es bedeit? Uf die Weis schließt mer immer mähner Leit aus, weil se nix mäh verstehen. Servus 2016, nemm dei Wort des Jahres ruhich mit, ich brauchs net un saach, was ich mään, verständlich un mit bassende Wörter: Prost Neijohr un alles Gute! Der Autor Hermann Josef Settelmeyer aus Lingenfeld schreibt seit 2002 diese Mundartkolumne für „Marktplatz regional“.